سبەی لە هەولێر گەورەترین پێشانگای نێودەوڵەتی کتێب بە بەشداری 22 وڵات دەکرێتەوە

ئاڤا نیوز

 

سبەی 9ـی نیسان، بە چاودێری سەرۆک مەسعود بارزانی، گەورەترین پێشانگای نێودەوڵەتی کتێب لە هەولێر دەکرێتەوە و سەدان خانەی بڵاوکردنەوە بەشداری دەکەن، 10 ڕۆژ بەردەوام دەبێت.

 

وێنە گەورەکە: وەک نەریتێکی ساڵانە لە مانگی نیسان، هەولێر گەورەترین پێشانگای کتێب لەخۆ دەگرێت، ناونیشانی پێشانگای ئەمساڵ "جیهان بە کوردی دەدوێت"، ساڵانە لەلایەن دەزگای ئەلمەدا بە هاوکاری وەزارەتی ڕۆشنبیری بەڕێوە دەچێت.

لێدوانی فەرمی: نەوزاد دزەیی، بەڕێوەبەری کارگێڕی پێشانگەی نێودەوڵەتی کتێب بە ئاڤا میدیای ڕاگەیاند، ئامادەکارییەکان بۆ کردنەوەی پێشانگاکە تەواو بوون و ئەمساڵ 350 خانەی بڵاوکردنەوە لە 22 وڵاتی وڵاتی عەرەبی و جیهانی بەشداری دەکەن. بەشێک لەو وڵاتانە لە دەوروبەر و وڵاتانی مەغریب و کەنداو بۆ یەکەمجارە بەشداری دەکەن.

 

ئەمەش بزانە: حەڤدەهەمین پێشانگای نێودەوڵەتی کتێب دەکەوێتە هۆڵی پێشانگاکان لەناو پارکی سامی عەبدولرەحمان، لەسەر ڕێگای موسڵ لە بەشی ڕۆژئاوای شاری هەولێر. ڕووبەری شوێنی پێشانگاکە 20 هەزار مەتر چوار گۆشەیە.