مامەڵەکردن بە دراوە ئەلیکترۆنییەکان و فۆرێکس قەدەغە دەکرێت

ئاڤا نیوز 

 

بەڕێوەبەرایەتیی ئاسایشی هەولێر، مامەڵەکردن بە هەموو دراوە ئەلیکترۆنییەکان قەدەغە دەکات و "هەر کۆمپانیایەک پابەند نەبێت لێپێچینەوەی لەگەڵ دەکرێت".

 

وێنە گەورەکە: دوای چەندین سکاڵای هاووڵاتییان و زەرەرمەندبوونیان، بەڕێوەبەرایەتیی ئاسایشی گشتیی هەولێر، هاووڵاتییان ئاگادار دەکاتەوە، مامەڵەکردن بە هەموو جۆرەکانی دراوی ئەلیکترۆنی و کانزایی (فۆرێكس) و USDT قەدەغەیە و بەپێی ڕێنماییەکانی بانکی ناوەندیی عێراق و هەرێمی کوردستان ڕێگەپێدراو نین.

 

ڕاگیێنراوی فەرمی: بەڕێوەبەرایەتیی ئاسایشی ئابووری سەر بە بەڕێوەبەرایەتی گشتیی ئاسایش ئاگاداری هاووڵاتییانی هەرێمی کوردستان دەکاتەوە کە مامەڵە کردن بە هەموو جۆرەکانی دراوی ئەلیکترۆنی کانزایی و (فۆرێکس) و (USDT) قەدەغەیە، کۆمپانیاکانی فۆرێکس و دراوی ئەلیکترۆنی لە هەرێمی کوردستان - عێراق ڕێگەپێدراو نین و مۆڵەتی فەرمییان نییە، بەپێی بڕیار و ڕێنماییەکانی بانکی ناوەندیی و عێراق  و وەزارەتی دارایی هەرێمی کوردستان و عێراق ڕێگەپێدراو نین و هیچ یاسا و ڕێنماییەک نییە بۆ ڕێکخستنی ئەو جۆرە چالاکییانە.

 

زانیاریی زیاتر: "سەبارەت بەو کۆمپانیانەی لەژێر ناوی جیا جیا کاری فۆڕێکس و کردنەوەی خولی فێربوونی چۆنیەتی مامەڵەکردن و کڕینی دراوی ئەلیکترۆنیی کانزایی ئەنجام دەدەن، نایاسایین و ڕێگەپێدراو نین". 

لەلایەکی دیکە: لە ڕاگەیێنراوەکەی ئاسایشدا هاتووە، "دوای چەندین سکاڵای هاووڵاتییان زەرەرمەندبوونیان لەڕێگەی ئەم کۆمپانیا و بڕۆکەرانە؛ ئەم بەیاننامەیە بڵاودەکەینەوە، داوا لە هاووڵاتییان دەکەین بۆ ئەوەی تووشی زیانی ماددی نەبن، دووربکەنەوە لەو جۆرە مامەڵانە و پارەکانیان بەفیڕۆ نەدەن، بە پڕوپاگەندە و ڕێکلامی کۆمپانیا و بڕۆکەرەکان هەڵنەخەڵەتێن و خۆیان بە دووربگرن".

ئەوەی پێویستە بیزانیت: "ئاگاداری گشت کۆمپانیا و بڕۆکەرەکان دەکەینەوە، لە ڕێگەی سۆشیال میدیا ڕێکلام بۆ کاری فۆڕێکس و دراوە کانزاییەکان نەکەن، بەپێچەوانە ڕووبەڕووی لێپێچێنەوەی یاسایی دەبنەوە" ئاسایشی هەولێر وادەڵێت.