وەزیری ناوخۆ: تەقەكەرەكانی گردەسێن دەستگیر كراون

ئاڤا نیوز

 

ڕێبەر ئەحمەد، وەزیری ناوخۆی هەرێمی كوردستان ئاشكرای دەكات، ئەو كەسانەی لە شەڕی نێوان دوو بنەماڵە لە گردەسێن لە ئاکرێ تەقەیان كرد، لەلایەن هێزە ئەمنییەكانەوە دەستگیر كراون.

 

چیرۆكی سەرەكی: شەوی 6-4-2025، لە ناحیەی گردەسێن لە سنووری پارێزگای دهۆك شەڕ لەنێوان دوو بنەماڵە ڕوویدا و بۆ چەند كاتژمێرێك تەقەكردن بەردەوام بوو و لە ئەنجامدا دوو كەس كە یەكێكیان پۆلیسە بریندار بوون و زیان بە چەند خانوو و ئۆتۆمبێلێكیش كەوت.

 

لێدوانی فەرمی: ڕێبەر ئەحمەد، وەزیری ناوخۆی هەرێمی كوردستان لە كۆنفڕانسێكی ڕۆژنامەوانیدا ڕایگەیاند: ئەو كەسانەی لە شەڕەكەی گردەسێن تەقەیان كرد، لەلایەن هێزەكانی پۆلیس و پێشمەرگەی زێرەڤانییەوە دەستگیر كران و ڕادەستی دادگا دەكرێن بۆ ئەوەی بە سزای یاسایی خۆیان بگەن.

 

زانیاریی زیاتر: "حكومەتی هەرێمی كوردستان بەردەوامە لە داماڵینی چەك و ڕێكخستنەوەی بابەتەكە، داوا لە هەموو ئەو كەسانە دەكەین كە چەكیان لەدەستە، چ چەكی فەرمی بێت چ مۆڵەتدار، چەكەكەیان بۆ مەبەستی كەسی و تێكدانی ئارامی و ئاسایشی هەرێمی كوردستان بەكارنەهێنن، چونكە ئەمە كاریگەریی ڕاستەوخۆی بۆ سەر ژیانی هاووڵاتییان دەبێت.