ماستەرپلانی سۆران ئامادە دەکرێت

ئاڤا نیوز

وەزارەتی شارەوانی و گەشتوگوزاری هەرێمی کوردستان داوا لە كۆمپانیا پەیوەندیدارەكان دەكات بەشدار بن لە داڕشتنی ماستەرپلانی سۆران.

وێنە گەورەکە: بەمەبەستی ئامادەکردنی ماستەرپلانی ئیدارەی سەربەخۆی سۆران، وەزارەتی شارەوانی کۆمپانیا و نووسینگە ڕاوێژکارییەکان ئاگادار دەکاتەوە بۆ پێشکەشکردنی خزمەتگوزاریی ڕاوێژکاری بۆ ئامادەکردنی ماستەرپلانی سۆران.

بڵاوكراوەی فەرمی: لە نووسراوەكەی وەزارەتی شارەوانیدا هاتووە: ڕووبەری فراوانبوونی شار 30 کیلۆمەتر دووجایە و ڕووبەری ئێستای شار 48 کیلۆمەتر دووجایە، پێویستە ڕاوێژکارە ئارەزوومەندەکان زانیاریی پێشکەش بکەن بۆ ئەوەی نیشانی بدەن ئەزموونی پەیوەندیدارییان هەیە بۆ پێوەرەکان بۆ لیستی کۆرتکراوە کە بریتین لە:

- ڕاوێژکار پێویستە لە هەرێمی کوردستان یان عێراق تۆمار کرا بێت و ئۆفیسی لە هەرێمی کوردستان هەبێت.

- ڕاوێژکار دەبێت پێشینە و ئەزموونی کارکردن و ووردەکاریی ئەزموونی پەیوەندیداری لەو بارەیەوە هەبێت، ئەو کارە هاوشێوانەی کە لە ماوەی ساڵانی ڕابردوودا لە هەرێمی کوردستان یان لە دەرەوەی هەرێمی کوردستان ئەنجامدراون پێشکەش بکات.

- ڕاوێژکار هەڵدەبژێردرێت بە پێی ڕێنمایی جێبەجێکردنی گرێبەستە گشتییەکانی ژمارە 2ـی ساڵی 2016 بە شێوازی ( Quality and cost- Based selectio) کوالێتی و تێچوون- هەڵبژاردن لەسەر بنەما.

ئەوەی پێویستە بیزانیت: دواکات بۆ پێشکەشکردنی گوزارشتکردن لە گرنگیدان لە ڕۆژی یەکشەممە 20- 4-2025 کاتژمێر 11ـی پێشنیوەڕۆ بە کاتی هەولێر دەبێت، ئەگەر ڕێککەوتی ئاماژەپێکراو پشووی فەرمی بوو ئەوا دوای پشووی فەرمی لە هەمان کاتی دیاریکراودا سەردانی لیژنەی هەڵسەنگاندن لە بەڕێوەبەرایەتیی گشتی نەخشەدانانی ئاوەدانی بکرێت بۆ پێشکەشکردنی گوزارشتکردن لە گرنگیدان  لە ناو زەرفێکی داخراودا، بڕی تێچووی ئەم بانگەوازە لە ئەستۆی ڕاوێژکارە براوەکە دەبێت.