یەکێتی لە کەرکووک داوایەک ئاراستەی پارتی دەکات

ئاڤا نیوز

هەشت مانگ بەسەر پێکهێنانی حکومەتی خۆجێی کەرکووک تێپەڕدەبێت، هێشتا فراکسیۆنی پارتی دیموکراتی کوردستان بەشداری هیچ کۆبووەنەوەیەکیان نەکردووە، ئەمڕۆ شاندێکی یەکێتی سەردانیان کردوون و باسی بەشداریکردنیان لە کۆبوونەوەکان کردووە.

وێنە گەورەکە: چەند ڕۆژێکە پارتی دیموکراتی کوردستان بەفەرمی بارەگای مەکتەبی ڕێکخستنی کەرکووک – گەرمیانی پارتی کردووەتەوە، چین و توێژەکان سەردانیان دەکەن و پیرۆزبایی گەڕانەوەیان لێدەکەن، جا ئەمڕۆش یەکێتیی نیشتیمانیی کوردستان بە چەپکێک گوڵەوە لەکەرکووک سەردانی پارتییان کرد و پیرۆزبایی کردنەوەی بارەگاکەیان لێکردن، لەو چوارچێوەیەشدا باس لە چەند پرسێک کراوە کە لە نێویاندا گەڕانەوە بۆ کۆبوونەوەکانی ئەنجوومەنە.

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک دەڵێت، "شاندەکەی یەکێتی داوایان کرد هەوڵی یەکڕیزی نێو ماڵی کورد بدرێت لەو چوارچێوەیەشدا پرسی گەڕانەوەی فراکسیۆنی پارتییان بۆ کۆبوونەوەکانی ئەنجوومەن خستەبەرباس."

باکگراوند: مانگی ئابی 2024 بە بەشداری پێنج ئەندامەکەی یەکێتی، سێ ئەندامی پێکهاتەی عەرەب و ئەندامێکی بابلیۆن و بە بێ ئامادەبوونی پارتی و تورکمانەکان، لە هۆتێل ڕەشیدی بەغدا پارێزگار و سەرۆکی ئەنجوومەنی پارێزگای کەرکووک هەڵبژێردران، ئەمەش ناڕەزایی لایەنەکانی بەشدارنەبووی بەدوایخۆیدا هێنا تا ئێستا بەشداری کۆبوونەوەکانیان نەکردووە.