كۆمپانیاكانی گەیاندنی خواردن ئاگادار دەكرێنەوە ماتۆڕی بێدەنگ و كارەبایی بەكاربهێنن

ئاڤا نیوز

وەزارەتی ناوخۆی حكومەتی هەرێمی كوردستان ماوەیەك بۆ كۆمپانیاكانی گەیاندن دیار دەكات كە سەرجەم ماتۆڕسكیلەكان لە بەڕێوەبەرایەتییەكانی هاتووچۆ تۆمار بكەن، هاوكات لەمەودوا ماتۆڕی بێدەنگ و كارەبایی بەكاربهێنن.

وێنە گەورەكە: لە دیوانی وەزارەتی ناوخۆ، بە ئامادەبوونی بەڕێوەبەری گشتی دیوان و بەڕێوەبەری گشتی هاتووچۆی هەرێمی کوردستان بە وەکالەت و بەڕێوەبەری هاتووچۆکانی پارێزگا و ئیدارە سەربەخۆکان و بەڕێوەبەرانی بەشی مۆڵەت و سەرپەرشتیارانی هۆبەکانی مۆڵەتی شۆفێری، كۆبوونەوەیەك كرا و چەند پرسێك تاووتوێ كرا، لەوانە سەركێشیی شۆفێرانی ئۆتۆمبێل و ماتۆڕسكیل و بێزاركردنی هاووڵاتیان.

ڕاگەیێنراوی فەرمی: بەڕێوەبەرایەتیی گشتیی هاتووچۆی هەرێمی كوردستان ڕایگەیاند: ڕێکكەوتن کراوە لەگەڵ کۆمپانیاکانی گەیاندنی خواردن کە دەست بکەن بە تۆمارکردنی ماتۆڕسکیلەکانیان لە بەڕێوەبەرایەتییەکانی هاتووچۆ و هێنانی ماتۆری بێدەنگ و کارەبایی بۆ کەمکردنەوەی ژاوەژاو کە بوونەتە هۆی بێزارکردنی هاووڵاتیان.

زانیاریی زیاتر: هاتووچۆی هەرێمی كوردستان بەڕێوەبەرانی هاتووچۆی پارێزگا و ئیدارەکان ڕادەسپێرێت کە دەست بگرن بەسەر هەر ماتۆڕسیكلێک کە دەستکاری دەنگی کردووە و خەڵک هەراسان دەکات، هەروەها ئەو ماتۆڕسوارانەی لەسەر شەقامەکان نمایش دەکەن و سەرکێشی دەکەن، هەر ماتۆڕسکیلێک تۆمارکراو نەبێت و تابلۆی نەبێت، دەستی بەسەردا دەگیرێت.

ئەوەی پێویستە بیزانیت: وەزارەتی ناوخۆ ماوەیەكی بۆ کۆمپانیاکانی گەیاندنی خواردن دیار كردووە كە دەبێت پێوەی پابەند بن لە تۆمارکردنی ماتۆڕەکانیان و هێنانی ماتۆڕی کارەبایی، بە پێچەوانەوە دەست دەگیرێ بەسەر ماتۆڕی تۆمارنەکراو و بێ تابلۆ.