کەرکووک؛ ڕوونکردنەوە لەسەر کڕینی 20 ئۆتۆمبێلی گرانبەها دەدرێت

ئاڤا نیوز

دوای ئەوەی کڕینی 20 ئۆتۆمبێلی گرانبەهای مۆدێل 2024 بۆ پارێزگار و ئەندامانی ئەنجوومەنی پارێزگای کەرکووک کاردانەوەی لەمیدیا و تۆڕە کۆمەڵایەتییەکان لێکەوتەوە، سەرۆکی ئەنجوومەنی پارێزگاکە وردەکاری کڕینی ئەو ئۆتۆمبێلانە ئاشکرا دەکات.

چیرۆکی سەرەکی: بەپێی ئەو زانیارییانەی لەمیدیا عێراقییەکان بڵاوکراوەتەوە، کڕینی ئەو ئۆتۆمبێلانە نزیکەی دوو ملیار و 629 ملیۆن دیناری تێچووە کە  15 ئۆتۆمبێلی تاهۆ، دوو ئۆتۆمبێلی تاهۆی زرێپۆش، دوو ئۆتۆمبێلی لاندکرۆزەر و یەک ئۆتۆمبێلی لێکسز لەخۆدەگرێت.

لێدوانی فەرمی: محەممەد ئیبراهیم حافز، سەرۆکی ئەنجوومەنی پارێزگای کەرکووک، ڕایگەیاند: پارێزگاری کەرکووک و ئەنجوومەنی پارێزگای کەرکووک بەهاوبەشی لیستی کڕینی ئەو جۆرە ئۆتۆمبێلانەیان نەک تەنیا بۆ ئەندامانی ئەنجوومەن، بەڵکو بۆ پارێزگار و جێگرەکانی پێشکەش کرد.

- ئەم پڕۆژەیە لەلایەن وەزارەتی پلاندانان و وەزارەتی داراییەوە پەسەندکراوە، پارەکەشی لە داهاتی دەروازە سنوورییەکانەوە بۆ تەرخانکراوە.

لەلایەکی دیکەوە: بەپێی چەند سەرچاوەیەک، ئۆتۆمبێلەکان بە پارەی پترۆ دۆلار کڕدراون لەکاتێکدا  پارەی پترۆ دۆلار دەبێت بۆ سەوزکردن و ژینگەی شارەکە خەرج بکرێت.