حكومەتی هەرێمی كوردستان زیاتر لە چوار ملیار دینار بۆ حەجی ئەمساڵ تەرخان دەكات

ئاڤا نیوز

بۆ دابینكردنی خزمەتگوزاریی زیاتر بۆ حاجییانی ئەمساڵی هەرێمی كوردستان، حكومەتی هەرێمی كوردستان چوار ملیار و 200 ملیۆن دینار تەرخان دەكات و هاوكات وەزارەتی ئەوقافیش پشكی كەسوكاری شەهیدان بۆ حەجی ئەمساڵ زیاد دەكات.

وێنە گەورەکە: ئەمساڵ پێنج هەزار و 120 كەس لە هەرێمی كوردستان گەشتی حەج دەكەن، لەو ژمارەیە هەزار و 602 كەس بە پاس گەشت دەكەن و ئەوانەی دیكە لە ڕێگەی فڕۆكەوە.

لێدوانی فەرمی: نەبەز ئیسماعیل، گوتەبێژی وەزارەتی ئەوقاف و كاروباری ئایینی حكومەتی هەرێمی كوردستان بە ئاڤا میدیای ڕاگەیاند:

٠ بۆ پاڵپشتیی حەجی حاجییانی ئەمساڵی هەرێمی كوردستان، حكومەتی هەرێمی كوردستان بڕی چوار ملیار و 200 ملیۆن دیناری تەرخان كردووە ئەمەش بۆ ئەوەی نرخی حەجكردن گران نەبێت و خزمەتی زیاتری حاجییانیش بكرێت لە سعوودیە.

٠ لەسەر بڕیاری وەزیری ئەوقاف، 120 كەس لە كەسوكاری شەهیدان بەبێ نۆرە گرتن ئەمساڵ دەچنە حەج و تیروپشكی ناوەكانیش لەلایەن وەزارەتی كاروباری شەهیدانەوە كراوە، ئەمە لە كاتێكدایە كە پێشووتر پشكەكە 45 بوو، ئەمساڵ بە بڕیاری وەزیر زیاد كرا.

ئەمەش بزانە: تێچووی حەجی ئەمساڵ لە هەرێمی كوردستان بە فڕۆكە حەوت ملیۆن دینارە و بە پاسیش پێنج ملیۆن دینارە.