ئەردۆغان پەیامێک ئاراستەی ئۆجەلان دەکات

ئاڤا نیوز

ئەمڕۆ لە کۆشکی سەرۆکایەتی تورکیا شاندی ئیمرالی و ئەردۆغان بۆ گفتوگۆکردن لەسەر پرسی ئاشتی کۆبوونەوە. ئەردۆغان لەڕێگەی شاندەکەوە پەیامێک بۆ ئۆجەلان دەنێرێت.

وێنە گەورەکە: دوای بڵاوکردنەوەی پەیامی عەبدوڵا ئۆجەلان، ڕێبەری زیندانیکراوی پەکەکە کە تێیدا داواکاری هەڵوەشاندنەوەی پەکەکە و ڕاگەیاندنی پرۆسەی ئاشتی لە تورکیا ئاراستەی هەموو لایەنەکان کرد، ئەمڕۆ شاندی دەم پارتی بۆ یەکەم جار دوای 13 ساڵ لەگەڵ ڕەجەب تەیب ئەردۆغان، سەرۆککۆماری تورکیا کۆبوونەوە.

لێدوانی فەرمی: سری سورەیا ئۆندار دوای کۆبوونەوەکە ڕایگەیاند، لەگەڵ سەرۆککۆمار کۆبوونەوەیەکی ئەرێنی و گرنگمان ئەنجامدا، هەروەک  پەروین بوڵدان، هاوسەرۆکی شاندی ئیمرالی پێش کۆبوونەوە لەگەڵ ئەردۆغان کۆبوونەوەکەی بە قۆناغێکی گرنگی پرۆسەی ئاشتی  ناوزەند کرد.

زانیاریی زیاتر: لە کۆبوونەوەکەدا ڕەجەب تەیب ئەردۆغان، سەرۆککۆماری تورکیا لە ڕێگەی شاندی ئیمرالیەوە پەیامێکی ئاراستەی عەبدوڵا ئۆجەلان، ڕێبەری زیندانیکراوی پەکەکە کردووە و چاوەڕوان دەکرێت لە ماوەیەکی نزیکدا شاندی دەم پارتی بۆ جاری چوارەم سەردانی ئیمرالی بکەنەوە و پەیام و ناوەڕۆکی کۆبوونەوە لەگەڵ ئەردۆغان بە عەبدوڵا ئۆجەلان بگەیەنن.

ئەوەی پێویستە بیزانیت: وەفدی ئیمرالی کە لە پەروین بوڵدان و سری سورەیا ئۆندار پێکهاتبوو، لەگەڵ ڕەجەب تەیب ئەردۆغان، ئیبراهیم کاڵن، سەرۆکی دەزگای هەواڵگری و ئاکیف ئالا، بریکاری سەرۆکی داد و گەشەپێدان بۆ ماوەی کاتژمێرێک و 25 خوولەک لە کۆبوونەوەدا بوون و چاوەڕوان دەکرێت لەسەر ناوەڕۆکی کۆبوونەوەکە ڕاگەیەنراوێک بڵاوبکرێتەوە.