وەزارەتی كشتوكاڵ سەبارەت بە گرفتی جووتیارانی دەشتی بەڕانەتی ڕوونكردنەوە دەدات

ئاڤا نیوز

وەزارەتی كشتوكاڵ و سەرچاوەكانی ئاو، سەبارەت بە ناڕەزایی و گلەیی جووتیارانی ناوچەی بەڕانەتیی دەشتی هەولێر لەبارەی كوژاندنەوەی زەوییە كشتوكاڵییەكان ڕوونكردنەوە دەدات.

چیرۆكی سەرەكی: دوێنێ پێنجشەممە 10-4-2025، جووتیارانی ناوچەی بەڕانەتیی هەولێر سەبارەت بە كوژاندنەوەی زەوییەكانیان گردبوونەوە و ئاماژەیان بە ئەوە دا كە لارییان نییە لە تەرخانكردنی زەوییەكانیان بۆ فەرمانبەران، بەڵام لەبەرامبەردا پێویستە هێندەی بەهای زەوییەكانیان قەرەبوو بكرێنەوە.

ڕاگەیێنراوی فەرمی: وەزارەتی كشتوكاڵ و سەرچاوەكانی ئاو ڕایگەیاند: ئاگاداری گرفتی ئەو جووتیارانەین و لەگەڵ نوێنەرەكانیان كۆبووینەتەوە، بەڵام نوێنەری وەزاری كشتوكاڵ لەو لیژنەیە ئەندام نییە كە پێكهێنراوە بۆ كوژاندنەوەی زەویی بەشێك لە جووتیارانی ناوچەی بەڕانەتی.

- لەماوەی ڕابردوو رێگری زۆرمان کردووە لەسەر چۆنیەتی بەکارهێنان و کوژاندنەوەی زەویی کشتوکاڵی بۆ پڕۆژەی ناکشتوکاڵی، خودی وەزیر بەدواداچوون و پاڵپشتی داواکاریی جووتیارانی دەشتی بەڕانەتی کردووە بۆ پارێزگاری لەو زەوییە بەپیتانە و خاکی ئەو ناوچەیە.

- سەرۆكایەتیی دیوانی ئەنجوومەنی وەزیرانمان لە ڕا و سەرنجی خۆمان سەبارەت بە بابەتەكە بە نووسراوی فەرمی ئاگادار كردووەتەوە.

- کوژاندنەوەی زەوییەکانی ئەو ناوچانە بە نووسراوێکی ئەنجوومەنی وەزیران ژمارە (3392) لە ڕێکەوتی 23-07-2024 بووە و دەسەڵات دراوەتە وەزارەتی شارەوانی و گەشتوگوزار بۆ کوژاندنەوەی ڕاستەوخۆی زەوییەکان.

- کوژاندنەوەی زەوییەکان بەپێی بڕیارێکی ڕاستەوخۆی ئەنجوومەنی وەزیران ئەنجام دراوە کە لەسەر پێشنیازێکی وەزارەتی شارەوانی بووە، بەپێی بڕیاری دابینکردنی زەوی بۆ فەرمانبەرانی هەرێمی کوردستان.