10 هەزار خانەنشینی دیکە لە وەرگرتنی زەوی سوودمەند دەبن

 

ئاڤا نیوز

ڕەزامەندی ژمارەیەک فەرمانبەر و خانەنشین لە ئەنجوومەنی وەزیران گەڕاوەتەوە بۆ ئەوەی زەوی وەرگرن، وەزارەتی شارەوانی چاوەڕێی گەڕانەوەی ناوەکانی قۆناغی چوارەمی دەکات کە زۆرینەیان خانەنشینن، ژمارەیان 10 هەزار زیاترن.

وێنە گەورەکە: لە قۆناغی سێیەمی پەسەندکردنی فۆڕمی وەرگرتنی زەوی ناوی حەوت بۆ هەشت هەزار خانەنشینانی تێدابوو، لە قۆناغی چوارەم وردبینی بۆ زیاتر لە 10 هەزاری دیکە کراوە و لە ئەنجوومەنی وەزیرانە بۆ ڕەزامەندی.

لێدوانی فەرمی: سەربەست مەولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی و گەشتوگوزار بە ئاڤای گوت، "نووسراوی لیستی ناوی 35 هەزار فەرمانبەر و كارمەندی ناوخۆ و خانەنشینان بۆ تەرخانكردنی زەوی بۆ ئەنجوومەنی وەزیران نێردراوە و بەمنزیکانە دەگەڕێتەوە، سوودمەندبووان لە وەزارەتەکانی ناوخۆ، تەندروستی و خانەنشینانن."

زانیاریی زیاتر: لە قۆناغی سێیەمدا ناوی خانەنشینی یەکی هەولێر و کۆیە و ئیدارەی ڕاپەڕین گەڕاوەتەوە، لەو لیستەیشی لە ئەنجوومەنی وەزیرانە، ناوی خانەنشینی پێشمەرگەش هەن بەهەردوو قۆناغ ناوی سەرووی 18 هەزار خانەنشین وردبینی کراوە.

بەشێکی زۆری شارەوانییەکان زەوی تەرخانکراویان هەیە، بەڵام دەیانەوێ بە گوێرەی خاڵی زۆر بۆ کەم، زەوی باش بۆ زەوی مامناوەند لەڕووی هەڵکەوتەیی و نرخ بەسەر سوودمەندبووان دابەش بکەن بۆ ئەو مەبەستەش دەبێت ناوی سەرجەم سوودمەندبووان بگەڕێتەوە.