ئەمریکا دوو مەرج بۆ ئێران دادەنێت

ئاڤا نیوز

هەوڵەکانی دانوستاندنی نێوان ئەمریکا و ئێران بەرەو پێشچوون بەخۆیەوە دەبینێت، بەڵام لە نوێترین لێدوانی نێردەی ترەمپ بۆ ڕۆژهەڵاتی ناوەڕاستدا ئاماژە بەوە دەدات، لە ئەگەری هەر ڕێککەوتنێک واشنتن دوو مەرجی بۆ تاران هەیە.

 

وێنە گەورەکە: ڕۆژی شەممە، 12-4-2025، شاندی ئەمریکا بە سەرۆکایەتیی ستیڤ ویتکۆف، نێردەی تایبەتی دۆناڵد ترەمپ بۆ کاروباری ڕۆژهەڵاتی ناوەڕاست لەگەڵ شاندی ئێران بە سەرۆکایەتیی عەباس عێراقچی، وەزیری دەرەوەی ئێران بە نێوەندگیری عوممان لە مەسقەت کۆبوونەوە، هەردوولا کۆبوونەوەکەیان بە ئەرێیی وەسف کرد.

 

لێدوانی فەرمی: ستیڤ ویتکۆف, نێردەی تایبەتی دۆناڵد ترەمپ بۆ ڕۆژهەڵاتی ناوەڕاست ڕایگەیاند،''هەر ڕێککەوتنێکی دیپلۆماسی لەگەڵ ئێران پەیوەستە بە دوو مەرجەوە، مەرجەکان بە پلەی یەکەم لەسەر لێکۆڵینەوە لە بەرنامەی پیتاندنی یۆرانیۆمی چەکی ئەتۆمی دەبێت، دووەمیان لێکۆڵینەوە لە پرسی چەک، ئەمەش مووشەک و جۆری مووشەکەکان دەگرێتەوە''.

 

زانیاریی بەدەستهاتوو: دوای ئەوەی چەند سەرچاوەیەک باسیان لە خولی دووەمی دانوستانەکان کرد کە بڕیاروابوو لە ڕۆما بەڕێوەبچێت، بەپێی ئاژانسی هەواڵی فەرمیی ئیرنا، وەزارەتی دەرەوەی ئێران ڕایگەیاند، گەڕی دووەمی دانوستانەکانی نێوان ئێران و ئەمریکا ڕۆژی شەممەی داهاتوو 19-4-2025  لە مەسقەت بەڕێوە دەچێت.