ماکرۆن بۆ ترەمپ: ڕووسیا ڕازی نەبێت بە ئاگربەست ئەوروپا وەڵامێکی یەکلاکەرەوەی دەبێت

ئاڤا نیوز

 

ئیمانوێل ماکرۆن، سەرۆکی فەرەنسا لە ڕێگەی دۆناڵد ترەمپەوە هۆشداری دەدات بە ڤلادیمێر پووتین و داوای ڕاگەیاندنی بەپەلەی ئاگربەست دەکات.

 

وێنە گەورەکە: ملیۆنان سەرباز و هاووڵاتی مەدەنی قوربانیی جەنگێکی وێرانکەرن کە زیاد لە سێ ساڵە لە نێوان ڕووسیا و ئۆکراینا بەرپا بووە و بەردەوامی جەنگەکە وەک قەیرانێکی کوشندە بەرۆکی هەردوو وڵات و جیهانی گرتووە، لەگەڵ هەوڵەکانی دۆناڵد ترەمپ، سەرۆکی ئەمریکا بۆ کۆتاییهێنان بە جەنگەکە فشاری وڵاتانی ئەوروپا بووە بە هۆکارێکی دیکە بۆ قورسکردنی دۆخی دانوستاندنەکان و دژایەتیکردنی داواکانی ئەوروپا لەلایەن ڕووسیاوە.

 

بڵاوکراوەی فەرمی: ئیمانوێل ماکرۆن، سەرۆکی فەرەنسا لە پلاتفۆرمی ئێکس سوپاسی دۆناڵد ترەمپ، سەرۆکی ئەمریکای کرد بۆ پەیوەندییە تەلەفۆنییەکەی و هەوڵەکانی بۆ ڕاگەیاندنی ئاگربەست و ڕایگەیاند، ئۆکراینا پێش دوو مانگ ڕازیبوونی خۆی بە ئاگربەستی 30 ڕۆژە دەربڕیووە و ئەوەی پرۆسەکە دوادەخات ڕووسیایە. هەر بۆیە لە ڕێگەی دۆناڵد ترەمپەوە پەیامێکی ئاراستەی پووتین کردووە و داوای کردووە بە زووترین کات مۆسکۆ ڕەزامەندی بۆ ئاگربەستی کاتی دەرببڕێت، بە پێچەوانەوە ئەوروپا وەڵامێکی یەکلاکەرەوەی بۆ ڕووسیا دەبێت.

 

زانیاریی زیاتر: ئیمانوێل ماکرۆن، سەرۆکی فەرەنسا ڕایگەیاندووە کە بەریتانیا و وڵاتانی دیکەی ئەوروپا بە تەواوی پشتیووانی لە داواکەی دەکەن و دەبێت ڕووسیا بە ئاگربەستی بێ مەرج ڕازی ببێت.