لەبارەی 'ئاو' تورکیا بەڵێنێک بە عێراق دەدات

ئاڤا نیوز

 

وەزیری سەرچاوەکانی ئاوی عێراق دەڵێت، تورکیا وەڵامی ئەرێنی داونەتەوە تا لە هاویندا پشکی ئاوی عێراق زیاتر بکات، بەفیڕۆدانی ئاویش لە عێراقدا ئاستی جیهانی تێپەڕاندووە.

 

لێدوانی فەرمی: عەون زیاب، وەزیری سەرچاوە ئاوییەکانی عێراق ڕایگەیاند، "تورکیا وەڵامی ئەرێنیی داونەتەوە و هیوادارین ئەنقەرە بەڵێنەکەی جێبەجێ بکات و لە هاویندا گەرەنتی پشکی عێراق بکات، هاوکات لەگەڵ ئێرانیش بۆ زیادکردنی پشکی بەردانەوەی ئاو بەگشتی و بەتایبەت لە ڕووباری کارۆن گفتوگۆ دەکەین".

 

لەلایەکی دیکەوە: غەزوان عەبدولئەمیر، بەڕێوەبەری کارپێکردنی پڕۆژەکانی ئاو لە وەزارەتی سەرچاوەکانی ئاوی عێراق ڕایگەیاند، ئەمساڵ ئاستی ئاوی کۆگاکراو بەراورد بە ساڵی ڕابردوو و ساڵانی پێشووتریش کەمترە، هۆکارەکەشی بۆ کەمبارانی و زیادکردنی بەردانەوەی ئاوی بەنداوەکان دەگەڕێتەوە بۆ سەرکەوتنی پلانی کشتوکاڵی.

 

بەوتەی ئەو بەرپرسە تێکڕای بەکارهێنانی ئاو لە حاڵەتی ئاساییدا بۆ دانیشتووانی گوندەکان 135 لیتر، بۆ قەزا و ناحییەکان 200 لیتر و بۆ شارەکانیش 240 لیترە، بەڵام لە هەندێک ناوچەی عێراق ڕۆژانە 700 لیتر ئاو بەکاردەهێنرێت ئەوەش لەسەرووی ئاستی جیهانییە، بۆیە دەبێت هەنگاوی بەپەلە و یەکلاییکەرەوە بنرێت.