داوای کرێی کەڵەکەبووی نۆ ساڵ پێش ئێستا لە دووکانەکانی بازاڕی داون تاونی هەولێر دەکرێت

ئاڤا نیوز

ژمارەیەک دووکان و کۆشک لە بازاڕی داون تاونی هەولێر کێشەی قەرزی کەڵەکەبووی کرێیان هەیە لەگەڵ ئەو کۆمپانیایەی بازاڕەکەی دروستکردووە و کۆمپانیاکەش هەڕەشەیان لێدەکات.

چیرۆکی سەرەکی: 120 دووکان و 90 کۆشک لە بازاڕی داون تاون لە هەولێر کێشەی قەرزی کۆمپانیایان هەیە، کۆمپانیا هەڕەشەی لێ کردبوون ئەگەر دەستبەجێ هەموو پارەکەی بەسەر یەکەوە پێنەدەن کارەبایان لەسەر دەبڕێت و دووکانەکەشیان پێ دادەخات.هەڕەشەکەی هەر بە قسە نەبووە، لە ڕۆژانی ڕابردوودا چوار دووکانی داخستبوون.

لەماوەی ڕابردووشدا چەند جارێک خۆپێشاندانیان کرد، بەڵام هیچ سوودێکی نەبوو و کێشەکەیان بۆ چارەسەر نەکرا، هەتا پەیوەندییەیان بە ئاڤاوە نەکرد،  دوای بەدواداچوونی ئاڤا کێشەکەیان تاڕادەیەک چارەسەر بووە.

قەرزەکە چۆن کەڵکەکە بووە

بازاڕی داون تاون ساڵی 2016 تەواو بووە، بەڵام قاتی ژێرزەمینی نزیکەی ساڵێکە تەواو بووە، ئەمە وەک دووکاندارەکان خۆیان دەیڵێن نزیکەی ساڵێکە کاری خۆیانی لێدەکەن. وەک دووکاندارێک بە ناوی هێمن محەمەد ئەڵێ، سەرەتا کۆمپانیا پێی گوتوون تاوەکو بازاڕەکە تەواو نەکرێت و بە فەرمی نەکرێتەوە و کلیلی دووکانەکانیان ڕادەست نەکرێت، کرێیان لێ وەرناگرێت، تەنانەت دەڵێن گرێبەستیشیان هەیە و لەسەر گرێبەستەکەش نووسراوە، بەڵام ئێستا کۆمپانیاکە دەڵێت دەبێت پارەی نۆ ساڵی ڕابردوو هەمووی بەسەر یەکەوە بدەن، لە 2016 ـەوە تا ئێستا. دووکان هەیە 50 وەرەقە قەرزارە هەتا سێ دەفتەر.

زانیاریی زیاتر: ئەم دووکاندارانە پەیوەندییان بە ئاڤاوە کرد،  داواکارییان ئەوە بوو هیچ نەبێت داشکانێکیان بۆ بکرێت، دەرفەتێکیشیان پێ بدەن تا قەرزەکە بدەنەوە.

لێدوانی فەرمی:  نەبەز عەبدلواحید، قایمقامی هەولێر بە ئاڤای ڕاگەیاند، بەدڵنیایەوە چاودێری کێشەکە دەکەن و بەدواداچوونی بۆ دەکەن، بەڵام لەکۆتاییدا ئەم کێشە ئیداریانە دادگا یەکلای دەکاتەوە.