لێبووردنی نێودەوڵەتیی ڕەخنە لە دۆخی ڕاگیراوان لە ڕۆژئاوای کوردستان دەگرێت

ئاڤا نیوز

ڕێکخراوی لێبووردنی نێودەوڵەتیی دەڵێت، دۆخی ڕاگیراوان لە ناوچەکانی باکوور و ڕۆژهەڵاتی سووریا نامرۆییانەیە و پێویست دەکات چاکسازییان تێدا بکرێت.

وێنە گەورەکە: لە هەردوو کەمپی هۆل و ڕۆژی ڕۆژئاوای کوردستان زیاتر لە 46 هەزار کەس دەستبەسەرکراون کە زۆرینەیان ژن و منداڵی ئەندامانی داعشن، زیاتر لە سێ مانگیشە ئەمریکا هاوکارییە نێودەوڵەتییەکانی بۆ کەمپەکانی ڕۆژئاوای کوردستان ڕاگرتووە و ئەوەش دۆخی ڕاگیراوانی سەختر کردووە.

ڕاگەیێنراوی فەرمی: ڕێکخراوی لێبووردنی نێودەوڵەتیی لە ڕاپۆرتێکدا کە ڕۆژی سێشەممە بڵاویکردووەتەوە، ئاماژەی بەوەکردووە، جگە لە ڕاگرتنی هاوکارییەکانی ئەمریکا، هێشتنەوەی دەیان هەزار کەس و ژن و منداڵ لەناو کەمپەکاندا کە بەشێکیان تەنیا گومانی ئەوەیان لەسەرە لایەنگری داعش بووبن، کارێکی نادروستە بەتایبەتیش کە بەشێکیان دەرفەتی ئەوەیان پێنەدراوە تانە لە یاساییبوونی ڕاگرتنیان بدەن، بەشێکی دیکەشیان ئەشکەنجە دراون و مامەڵەی خراپیان لەگەڵ کراوە.

زانیاریی زیاتر: ڕێکخراوی لێبووردنی نێودەوڵەتی داوا دەکات نەتەوە یەکگرتووەکان و هاوپەیمانی نێودەوڵەتی بەسەرۆکایەتی ئەمریکا پشتیوانی هەوڵەکان بن بۆ کەمکردنەوەی ژمارەی ڕاگیراوان و گەڕانەوەی بیانییەکان بۆ وڵاتانی خۆیان، هاوکات بە پێویستیشی دەزانێت حکومەتی سووریا و ئیدارەی خۆسەر چاکسازیی لە دۆخی کەمپەکان و سیستەمی ڕاگیراوەکاندا بکەن.

لەلایەکی دیکەوە: لە کۆبوونەوەی ئەمڕۆی ئەنجوومەنی وەزیرانی عێراقدا بڕیاردرا لەسەر بودجەی ڕاوێژکارییەتی ئاسایشی نیشتیمانی، کۆنگرەیەکی نێودەوڵەتیی تایبەت بە کەمپی هۆل ببەسترێت، ئەویش بەهۆکاری ئەوەی لەو کەمپەدا 18 هەزار چەکدار، ژن و منداڵی بە ڕەگەز عێراقی ڕاگیراون.