پەیامێکی تووند لە ئەمریکاوە بۆ عێراق لەبارەی هەرێمی کوردستان

ئاڤا نیوز

مارکۆ ڕۆبیۆ، وەزیری دەرەوەی ئەمریکا، کە هاوکات ڕاوێژکاری ئاسایشی کۆشکی سپییە و دووەم کەسی بەهێزی ئەمریکایە لەدوای دۆناڵد ترەمپ. لە کۆنگرێسی ئەمریکا قسەی کرد و هەڕەشەی لە عێراق کرد بەوەی دەبێت ئۆتۆنۆمی کوردستان و مافەکانی بپارێزێت.

چیرۆکی سەرەکی: لە کۆنگرێس لەلایەن لیژنەی پەیوەندییەکانی دەرەوە پرسیار لە مارکۆ ڕۆبیۆ کرا لەبارەی هەرێمی کوردستان و ئەو دوو گرێبەستەی دوو کۆمپانیا ئەمریکیەکە لەگەڵ کوردستان ئیمزایان کردوون بە بەهای 110 ملیار دۆلار کە عێراق ناڕازییە.

لێدوانی فەرمی: مارکۆ ڕۆبیۆ، وەزیری دەرەوەی ئەمریکا ڕایگەیاند، ئێمە بەڕوونی بە حکومەتی عێراقمان وتووە، ئەگەر دەیەوێت پەیوەندییەکی باشی هەبێت لەگەڵ ئیدارەی ئەمریکا، دەبێت سێ شتی سەرەکی بکات:

یەکەم: پاراستنی ئۆتۆنۆمی کوردستان و مافەکانی، وە ڕێگەنەگرتن لە هیچ گەشەیەکی ئابووری و خۆشگوزەرانی هەرێمی کوردستان.

دووەم: پاراستنی مافی کۆمپانیا ئەمریکییەکان و وەبەرهێنەرانی ئەمریکا عێراق.

سێیەم: کەمکردنەوەی کاریگەری میلیشیا شیعەکانی سەر بە ئێران لەناو حکومەت و سێکتەرە جیاوازەکان، چونکە ئاگادارین چ کاریگەرییەکیان هەیە، ئەمە قابیلی قبووڵ نییە و دەبێت وەڵام بدرێتەوە.

زانیاریی زیاتر: وەزیری دەرەوەی ئەمریکا جەختیشی کردەوە، بەغدا دەبێت بزانێت سیاسیەتی سەرەکی ئەمریکا لە عێراق بریتییە لە پاراستنی بەرژەوەندییەکانی ئەمریکا و نەهێشتنی هیچ ڕێگرییەک بۆ بەرەوپێشچوونەکانی ئەمریکا.

تەواوی قسەکانی مارکۆ ڕۆبیۆ، وەزیری دەرەوەی ئەمریکا لە وەڵامی کۆنگرێسی ئەمریکا

ئەو ئۆتۆنۆمییەی کە کورد لەو بەشەی وڵات هەیەتی دەروازەیەکی گرنگی ئێمەیە بۆ عێراق کە بە هۆیەوە ژیانی ئابووری و گەشەی ئابوورییان فەراهەمکردووە و سەرکەوتوو بوون. بەرپرسانی عێراقی ویستی خۆیان نیشانداوە بۆ بوونی پەیوەندیی نزیک و باشتر لەگەڵ ئەمریکا و ئێمە بۆیانمان ڕوون کردوونەتەوە کە چەقی ئەوە ڕێزگرتنە لەو کۆمپانیایانەی کە لەوێ کار دەکەن. هەروەها ڕێزگرتن لەو ئۆتۆنۆمییەی کە کورد هەیەتی. کاریگەریی ئێران کە بەداخەوە لە هەندێک بوار لە زیادبووندایە لە بواری حکومەت و مەترسی بۆ سەر ئەمریکا درووست دەکەن لە ناویشیاندا میلیشیا شعییەکانی  سەر بە ئێران کە پێشتر لە دژی ئەمریکا کاریان کردووە، هەروەها ئەوەشیان نیشانداوە کە لە داهاتوودا بەردەوام بن و ئەوەش جێگەی پەسەندکردن نییە و دەبێت وەڵام بدرێنەوە.