لە سۆران ژمارەیەک ئاژەڵدار بە 10 ملیۆن دینار سزا دران

ئاڤا نیوز

ئیدارەی سەربەخۆی سۆران، ژمارەیەک ئاژەڵداری بە 10 ملیۆن دینار سزا دا، بەهۆی ئەوەی ئاژەڵەکانیان بە پیادەڕۆ بۆ کوێستانەکانی قەزای سۆران دەگواستەوە و ئاستەنگی هاتووچۆیان دروست دەکرد.

وێنە گەورەکە: هەرێمی کوردستان خاوەنی چەندین ناوچەی کوێستانییە، ساڵانە لەگەڵ دەستپێکی وەرزی هاوین ئاژەڵداران ئاژەڵەکانیان بۆ کوێستانەکان دەگوازنەوە، حکومەتیش ڕێنمایی دەکردووە پێویستە بە بارهەڵگر ئاژەڵەکان بگوازنەوە و کاتییان بۆ دیاری کراوە.

لێدوانی فەرمی: جێگر حوسێن، بەڕێوەبەری ناحیەی سرێشمە، بە ئاڤا میدیای وت، هەفتەی ڕابردوو شەش ئاژەڵدار سەرپێچییان کردووە، هیچیان خەڵکی سرێشمە و ناوچەکە نەبوون، بەڵکو لە ناحیەی بجیلی قەزای ئاکرێ هاتبوون، بە پشت بازگەکان سوڕابوونەوە دەیانویست ئاژەڵەکان بگوازنەوە بۆ کوێستانەکانی سۆران، بەڵام هەموویان لەڕێگا لەلایەن ئاسایشی خەلیفان دەستبەسەر کران و سزا دران.

زانیاریی زیاتر: تا ڕۆژی 2025-05-20، هیچ ئاژەڵدارێک ناتوانێت ئاژەڵەکانی بۆ کوێستانەکان بگوازێتەوە، جگە لەوەی پێیان وتراوە تەنیا بۆیان هەیە بە بارهەڵگر ئاژەڵەکان بگوازنەوە و بە پیادە بە هەموو شێوەیەک قەدەغەیە.