لە عێراق و هەرێمی کوردستان سەرجەم حەجخوازانی ڕێگای وشکانی گەیشتنە سعودییە

ئاڤا نیوز

 

دەستەی حەج و عومرەی عێراق ڕایگەیاند، لە ڕێگەی هەزار و 50 پاس و لە ماوەی 10 ڕۆژدا، ئەو حەجخوازانەی عێراق و هەرێمی کوردستان کە بڕیاریاندابوو بەڕێگەی وشکانی فەریزەی حەج جێبەجێ بکەن، سەرجەمیان گەیێنرانە شوێنە پیرۆزەکانی سعودیە.

 

ئەوەی پێویستە بیزانیت: ئەمساڵ لە هەرێمی کوردستانەوە، پێنج هەزار و 136 حەجخواز گەشتی حەج دەکەن، لەو ژمارەیە هەزار و 440 کەسیان بەڕێگای وشکانی گەشت دەکەن.

 

ڕاگەیێنراوی فەرمی: دەستەی حەج و عومرەی عێراق بڵاویکردەوە، کۆتا پاسی گواستنەوەی حەجخوازان لە ڕێگەی وشكانییەوە گەیشتنە شاری مەدینە، بەوەش لە ماوەی 10 ڕۆژدا سەرجەم حەجخوازانی ڕێگای وشکانی لە عێراق و هەرێمی کوردستانەوە گەیێنرانە سعودیە.

 

دەستەکە سوپاسی ‌هێزە ئەمنییەکان و ئیدارەی پارێزگاکان دەکات، جەختیش دەکاتەوە کە لە کاتی گواستنەوەی حەجخوازاندا هیچ ڕووداوێکی هاتووچۆ و نەخوازراو ڕووینەداوە.