سعودیە لە 600 شوێن فرۆشگای خواردنەوە کحولییەکان دەکاتەوە

ئاڤا نیوز

 

لە سعودیە "شۆڕشی کرانەوە" دەستیپێکردووە، لەپاڵ بەڕێوەبردنی سەدان ئاهەنگی گۆرانیی و موزیک و ڤێستیڤاڵی نێودەوڵەتی، لە ساڵی داهاتووەوە حکومەتی وڵاتەکە هەنگاوێکی دیکە دەنێت و فرۆشتنی خواردنەوە کحولییەکان لە 600 شوێنی وڵاتەکەیدا ئاسایی دەکاتەوە.

 

وێنە گەورەکە: لە سعودیە تا ساڵی 1951 خواردنەوە کحولییەکان ڕێگەپێدراوبوو، بەڵام لەو ساڵەدا و لە بۆنەیەکدا یەکێک لە شازادەکانی ئەو وڵاتە بەناوی مشاری بن عەبدولعەزیز تەقەی لە سیرێل عوسمان، جێگری کونسوڵی بەریتانیا لە جەددە کرد، بەهۆی ئەوەی ڕەتیکردبووەوە پەرداخێکی دیکەی مەشروبی پێبدات، بەوهۆیەش ساڵی 1952 مەلیک عەبدولعەزیز پادشای سعودیە قەدەغەی گشتی بەسەر خواردنەوە کحولییەکاندا سەپاند، مشاریش بە کوشتن سەرکۆنە کرا.

 

بڵاوکراوەی فەرمی: ماڵپەڕی واین ئینتێڵجێنس-ی بەریتانی کە تایبەتمەندە بە هەواڵ لەسەر خواردنەوە کحولییەکان بڵاویکردەوە، لە چوارچێوەی ڕوانگەی سعودیە 2030 و خۆئامادەکردن بۆ جامی جیهانی تۆپی پێ 2034، شانشینی سعودیە بڕیاریداوە ڕێگە بە فرۆشتنی خواردنەوە کحولییەکان لە 600 شوێنی مۆڵەتپێدراوەی وڵاتەکەیدا بدات.

 

زانیاریی زیاتر: بڕیارەکە هۆتێلە پێنج ئەستێرەکان، هاوینەهەوارە ئاست بەرزەکان، باڵیۆزخانەکان، ناوچە گەشتیارییەکانی وەک نیوم و سندالە، کۆمەڵگەی بیانییەکان و ڕووداوە نێودەوڵەتییەکان گرنگەکان لەخۆدەگرێت، واتە تەنیا لەو شوێنانە خواردنەوە کحولییەکان بەردەست دەبن.

 

قووڵتر: بەگوێرەی ماڵپەڕەکە، ئەو خواردنەوەوانەی ڕێژەی کحول تیایاندا 20% زیاترە هەر بە قەدەغەکراوی دەمێننەوە، هاوکات لە شوێنە گشتییەکان، ماڵەکان، دووکانەکان و بۆ مەبەستی کەسی، فرۆشتنی خواردنەوە کحولییەکان هەر بە قەدەغەکراوی دەمێنێتەوە، بەوتەی دەسەڵاتدارانیش ئەم هەنگاوە دەستبەسەرداربوون نییە لە بەها کولتوری و ئاینییەکان بەڵکو بەدیهێنانی هاوسەنگییە لە نێوان کرانەوەی ئابووری و پاراستنی ناسنامەی نیشتمانیی وڵات.

 

ئەوەی پێویستە بیزانیت: سعودیە لە چوارچێوەی ڕوانگەی 2030 کە محەممەد بن سەلمان شازادەی جێنشینی وڵاتەکەی ڕایگەیاندووە، کار بۆ هەمەجۆرکردنی داهاتەکان و کەمکردنەوەی پشتبەستن بە نەوت دەکات، ئەویش لە ڕێگەی گەشەپێدانی کەرتی گەشتیاری، ڕاکێشانی وەبەرهێنانی بیانی، ڕەخساندنی هەلی کاری نوێ لە ڕێگەی کەرتەکانی میوانداریکردن و بەسەربردنی کاتەوە، ئەم هەنگاوەش بە ڕێگەپێدانی فرۆشتنی خواردنەوە کحولییەکان پێشتر لە ئیمارات و بەحرەین جێبەجێکراوە، وەک کرانەوە و هەوڵێک بۆ ڕاکێشانی زیاتری گەشتیار و زیادکردنی جوڵەی ئابووری.