بەڵێنێكی دیكەی مەسرور بارزانی بۆ خەڵكی هەڵەبجە جێبەجێ دەكرێت

ئاڤا نیوز

پرۆژەیەكی گرنگی ڕێگەوبان بۆ شارەدێی بەمۆ، لە داهاتی 20%ـی مەرزەكانی سنووری پارێزگای هەڵەبجە جێبەجێ دەكرێت.

وێنە گەورەكە: دوای سەردانی سەرۆكوەزیران مەسرور بارزانی، بۆ سنووری پارێزگای هەڵەبجە و بەلەبەرچاوگرتنی داواكارییەكانی هاووڵاتیانی پارێزگاكە كە خۆی لە نۆ داواكاری دەبینێتەوە، بڕیاردرا ڕێژەی 20%ـی داهاتی دەروازە سنوورییەكانی سنووری پارێزگای هەڵەبجە، بۆ پرۆژە خزمەتگوزارییەكانی پارێزگاكە تەرخان بكرێت و  دەسەڵاتیش بدرێتە پارێزگار و بەرپرسانی ئیداریی شارەكە، بۆ جێبەجێكردنی.

چیرۆكی سەرەكی: ئەنجوومەنی وەزیرانی هەرێمی كوردستان، ئەمڕۆ یەكشەممە 25-5-2025، ڕەزامەندی داوە بڕی زیاتر لە دوو ملیاردینار بۆ پڕۆژەی ڕێگای ناحیەی بەمۆ -پشتە لەسنوری پارێزگای هەڵەبجە تەرخان بکرێت کە دەکاتە کۆی ڕێژەی 20%ـی داهاتی مەرزەكان لەماوەی ساڵێكدا.

لێدوانی فەرمی: کاوە عەلی، جێگری پێشووی پارێزگاری هەڵەبجە بە ئاڤا میدیای ڕاگەیاند، ئەمڕۆ یەکێکی تر لەو نۆ داواکارییەی خەڵکی هەڵەبجە جێبەجێکرا کە ساڵی ڕابردوو، سەرۆکوەزیران مەسرور بارزانی لەمیانی سەردانەكەی بۆ هەڵەبجە، خرایە بەردەمیان و واژۆی لەسەر جێبەجێكردنیان كرد، ئەویش تەرخانكردنی بڕی دوو ملیار و 149 ملیۆن دینارە بۆ پرۆژەی ڕێگای ناحیەی بەمۆ - پشتە.