ئاڤا بەدواداچوون بۆ دیاردەی دزیکردن لە عەلوەی هەولێر دەکات

ئاڤا نیوز

دیاردەی دزیکردن لە عەلوەی هەولێر، خاوەن دووکانەکانی نیگەران کردووە و پۆلیسیش دەڵێت تا ئێستا کەس سکاڵای تۆمار نەکردووە، بەڵام بەدواداچوون لەو بابەتە دەکەین.

چیرۆکی سەرەکی: هەندێک کرێکار فێربوون نزیک دەبنەوە لە دووکانەکان و لە خۆیانەوە سندووقێک تەماتە یان خەیار دەخەنە سەر شانیان و دەڕۆن، خاوەن دووکانیش بەهۆی قەرەباڵغی و سەرقاڵی پێیان نازانێت. یان بەشێکی ئەو بەقاڵانەی دێنە عەلوە، بۆ نموونە دوو سندووق تەماتە دەکڕن، کەچی بە کرێکارەکە دەڵێن، چوار سندووق بار بکە.

چی ڕوویدا: دووکاندارێک دەڵێت بە سوتفە سەیری کامێراکانی چاودێری کردووەتەوە، دەبینێت کرێکارێک تەلەفۆنی خستووەتە بن گوێی و وەردە وردە لە سندووقە تەماتەیەک نزیک دەبێتەوە، لەناکاو دەیخاتە سەر شانی و دەیبات.

لێدوانی فەرمی: رەجەب عەزیز، سەرۆکی ئەنجوومەنی عەلوە دەڵێت، ئەم دیاردەیە زۆرە، هەندێک جار کرێکارەکە دەبینیت سندووقێک دەخاتە سەر شانی کە ئاشکرا دەبێت، دەڵێت ببوورە وەڵا بە هەڵە هەڵمگرتووە.

بۆچوونی لایەنی بەرامبەر: نەقیب کارزان ساڵح، وتەبێژی پۆلیسی هەولێری دەڵێت، تیمێکمان بەردەوام رۆژانە لەوێیە، تا ئێستا کەس سکاڵای تۆمار نەکردووە بەڵام دوای بەدواداچوونی ئاڤا هەر ئەمڕۆ دەست بە بەدواداچوون بۆ ئەم بابەتە دەکەین.