پڕۆژەی ئاوی گۆپتەپە - چەمچەماڵ دەستپێدەکاتەوە

ئاڤا نیوز

بەڕێوەبەری گشتی ئاو و ئاوەڕۆی هەرێمی کوردستان دەڵێت: وەزارەتی دارایی و ئابووری پێنج ملیار دیناری تەرخانکردووە بۆ دەستکردنەوە بە کارکردن لە پڕۆژەی ئاوی گۆپتەپە - چەمچەماڵ.

وێنە گەورەکە: پڕۆژەی ئاوی گۆپتەپە – چەمچەماڵ، یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، مانگی ئابی 2024 کارکردن لە پڕۆژەکە دەستیپێکرد، بەڵام ماوەی چەند هەفتەیەکە ئەو کۆمپانیایەی کاری لە پڕۆژەکە دەکرد بەهۆی بەردەست نەبوونی بودجە کارەکانی ڕاگرت.

لێدوانی فەرمی: ئاری ئەحمەد، بەڕێوەبەری گشتی ئاو و ئاوەڕۆی هەرێمی کوردستان بە ئاڤا میدیای وت، لەلایەن وەزارەتی دارایی و ئابووری هەرێمی کوردستان بڕی پێنج ملیار دینار بۆ دەستکردنەوە بە پڕۆژەکە تەرخانکراوە و ئیدی کارکردن تێیدا دەستپێدەکاتەوە.

باکگراوند: گوژمەی پڕۆژەی ئاوی گۆپتەپە – چەمچەماڵ، نزیکەی 115 ملیار دینارە. لە یەک کاتژمێردا توانای بەرهەمهێنانی سێ هەزار و 400 مەتر سێجا ئاوی هەیە و زیاتر لە 480 هەزار کەس لێی سوودمەند دەبێت، پڕۆژەکە بەجۆرێکە کێشەی کەمئاوی لە چەمچەماڵ چارەسەر دەکات.