ئەمریکا لەبارەی دۆسیەی ئەلیزابێس تسۆرکۆڤ ڕوونکردنەوە دەدات

ئاڤا نیوز

وەزارەتی درەوەی ئەمریکا ڕایدەگەیێنێت، گفتوگۆکان سەبارەت بە دۆسیەی ئەلیزابێس تسۆرکۆڤ، توێژەرە ئیسرائیلی - ڕووسییەکە بەردەوامە، بەڵام هیچ ڕێککەوتنێک نییە بۆ ئاڵوگۆڕکردنی بە چەند دیلێکی ئێرانی.

چیرۆکی سەرەکی: لە سەرەتای مانگی تەمموزی ساڵی 2023ـدا ئیسرائیل ڕفاندنی ئەلیزابێس تسۆرکۆڤ، توێژەری زانکۆی پرینستۆنی ئەمریکی و هەڵگری وڵاتینامەی ئیسرائیلی و ڕووسیی لەلایەن گرووپێکی چەکدارەوە لە بەغدای پایتەختی عێراق ڕاگەیاند.

ئەوەی لەوبارەیەوە دەگوترێت: چەند ڕۆژێک لەمەوبەر لە بەشێک لە میدیاکانی عێراق لە زاری سەرچاوەیەکی تایبەتەوە دەنگۆی ئەوە بڵاوکرایەوە، ڕفێنەرانی ئەلیزابێس تسۆرکۆڤ، كچە بارمتە ئیسرائیلییەكە، داوای ئازادكردنی دەستگیركراوێكی ئێرانی و شەش كەسی دیکەیان كردووە، تاوەکو ئەوانیش ئەو لێکۆڵەرە ئازاد بکەن.

بۆچوونی لایەنی بەرامبەر: وتەبێژی وەزارەتی دەرەوەی ئەمریکا، کە قسەی بۆ میدیای عێراق کردووە، ئاماژە بۆ ئەوە دەکات، گفتوگۆکان سەبارەت بە دۆسیەی ئەلیزابێس تسۆرکۆڤ، کە لەلایەن گرووپێکی چەکدارییەوە لە عێراق دەستبەسەرە، بەردەوامە.

لێدوانی فەرمی: وتەبێژی وەزارەتی دەرەوەی ئەمریکا لە وەڵامێکی نووسراودا ڕایگەیاندووە، هەرچەندە گفتوگۆکان بەردەوامن، بەڵام ئەو دەنگۆیانەی باس لە ڕێککەوتنێک بۆ ئاڵوگۆڕ دەکەن، بە تەواوی دوورن لە ڕاستییەوە.

لەلایەکی دیکەوە: هەر لەو چوارچێوەیەدا، سەرچاوەیەکی ئاگادار لەبارەی دۆسیەی تسۆرکۆڤ چەند پێشهاتێکی نوێی ئاشکرا کردووە و ئاماژە بۆ ئەوە دەکات کە دانوستانەکان بەرەو قۆناغێکی نوێ ڕۆیشتوون دوای ئەوەی سەرۆکوەزیرانی عێراق ڕێنمایی کرد کە هیچ دەزگایەکی فەرمی حکومەت دەستوەردان لەو بابەتەدا نەکات.

زانیاریی بەدەستهاتوو: بە گوتەی سەرچاوەکە، دیارترین ئەو ناوانەی کە لە دانوستانەکان بۆ ئازادکردنی تسورکۆڤ باس دەکرێن، عیماد ئەمهەز، ئەندامی حیزبوڵڵای لوبنانی و پێنج کەسی دیکە هەن کە لە ئۆپراسیۆنێکی تایبەتدا لەلایەن یەکینەیەکی ئیسرائیلیەوە دەستگیرکراون، دوو لەوانە هاووڵاتیی ئێرانی بوونە.