سەرۆك بارزانی: شۆڕشی گوڵان بۆ هەمووانی سەلماند ئیرادەی ئازادیخوازیی كورد ناشكێت

ئاڤا نیوز

سەرۆك بارزانی ڕایدەگەیەنێت، شۆڕشی گوڵان بۆ هەمووانی سەلماند كە ئیڕادەی تێكۆشان و خەباتی گەلی كوردستان بۆ ئازادی، هەرگیز ناشكێت و بەردەوام دەبێت.

وێنە گەورەکە: بەهۆی بەردەوامی سیاسەتی چەوسانەوە و پاکتاوی ڕەگەزی و پێنەدانی مافەکانی کورد لەلایەن ڕژێمی حكومڕانی ئەوسای عێراقدا، 49 ساڵ لەمەوبەر و لە ڕۆژێكی وەك ئەمڕۆ؛ لە درێژەی كاروانی بزووتنەوەی ڕزگاریخوازی نەتەوەی كورد، شۆڕشی گوڵان سەریهەڵدا كە بە یەکێک لە شۆڕشە گرنگەکانی کورد لە مێژووی هاوچەرخ دادەنرێت و پارتی دیموکراتی کوردستان سەرکردایەتی دەکرد.

پەیامی فەرمی: سەرۆك بارزانی بۆ یادی 49 ساڵەی هەڵگیرساندنی شۆڕشی گوڵان پەیامێكی بڵاوكردەوە و ڕایگەیاند، شۆڕشی گوڵان، لە بارودۆخی نالەباری دوای نسكۆی شۆڕشی ئەیلوول و لە ئاوارەیی و لەژێر گوشاری جۆراوجۆری نەیارانی گەلی كوردستان، بە پلانێكی وردی تەنزیمی و سەربازی و بە ئیڕادەیەكی بەهێز هەڵگیرسا.

دەقی پەیامەکەی سەرۆک بارزانی بۆ چل و نۆیەمین ساڵیادی هەڵگیرساندنی شۆڕشی گوڵان

بەناوی خودای بەخشندە و میهرەبان

شۆڕشی گوڵان، یەكێكە لە گرنگترین وێستگەكانی بەرخودان و خەباتی گەلی كوردستان كە درێژكراوە و هەڵگری پەیام و ئامانجەكانی شۆڕشی مەزنی ئەیلوولە. لە بارودۆخی نالەباری دوای نسكۆ و لە ئاوارەیی و لەژێر گوشاری جۆراوجۆری نەیارانی گەلی كوردستان توانرا بە پلانێكی وردی تەنزیمی و سەربازی و بە ئیرادەیەكی بەهێز شۆڕشی گوڵان هەڵبگیرسێت.

لە شۆڕشی گوڵاندا گەلەكەمان قوربانیی زۆری دا، زۆر پێشمەرگەی قارەمان گیانی خۆیان فیدای كوردستان كرد، بەشێكی زۆری ڕۆڵەكانی گەلەكەمان ئاوارەیی و ماندوویەتی و كۆڵنەدانیان هەڵبژارد. شۆڕشی گوڵان بۆ هەموو لایەكی سەلماند كە ئیرادەی تێكۆشان و خەباتی گەلی كوردستان بۆ ئازادی هەرگیز ناشكێت و بەردەوام دەبێت.

لە چل و نۆیەمین ساڵیادی شۆڕشی گوڵاندا، سڵاو بۆ گیانی یەكەم شەهیدی شۆڕشی گوڵان شەهید سەید عەبدوڵڵا حاجی ئۆمەرانی و هەموو شەهیدانی كورد و كوردستان دەنێرین، هەروەها پێزانینم بۆ هەموو ئەو تێكۆشەر و پێشمەرگە و ئەو نیشتیمانپەروەرانە هەیە كە ڕۆڵیان لە شۆڕشی گوڵاندا هەبوو و شانازییان بۆ گەلەكەمان تۆمار كرد.