نێچیرڤان بارزانی: شۆڕشی گوڵان ئیرادەی گەلێکە بۆ ڕەتکردنەوەی ستەم و داگیرکاری

هەواڵ
26 ئایار

شەیری بکە لە:

نێچیرڤان بارزانی: شۆڕشی گوڵان ئیرادەی گەلێکە بۆ ڕەتکردنەوەی ستەم و داگیرکاری

نێچیرڤان بارزانی، جێگری سەرۆکی پارتی دیموکراتی کوردستان

ئاڤا نیوز

جێگری سەرۆکی پارتی دیموکراتی کوردستان لە یادی شۆڕشی گوڵاندا پەیامێک بڵاودەکاتەوە، دەڵێت 'ئەرکی هەموومانە فیدراڵی و دەستەکەوتە دەستوورییەکان بپارێزین'.

وێنە گەورەکە: لە ڕۆژێکی وەکو ئەمڕۆی ساڵی 1976 شۆڕشی گوڵان بە سەرکردایەتی پارتی دیموکراتی کوردستان سەری هەڵدا، هۆکاری سەرهەڵدانی ئەم شۆڕشەش بەردەوامی سیاسەتی چەوسانەوە و پاکتاوی ڕەگەزی و نەبوونی مافەکانی کورد بوو لەلایەن ڕژێمی بەعس لە چوارچێوەی دەوڵەتی عێراق دا.

پەیامی فەرمی: نێچیرڤان بارزانی، جێگری سەرۆکی پارتی دیموکراتی کوردستان، دەڵێت؛ لە یادی 49 ساڵەی هەڵگیرسانی شۆڕشی گوڵاندا، بەڕێز و شکۆدارییەوە شەهیدانی نەمر و هەموو قارەمان و جوامێرانە بەبیر دەهێنینەوە کە لەم شۆڕشەدا خوێنیان لە پێناو ئازادیدا بەخشی.

دەقی پەیامەکەی نێچیرڤان بارزانی، جێگری سەرۆکی پارتی دیموکراتی کوردستان

لە کاتێکدا ئەمڕۆ یادی 49 ساڵەی ھەڵگیرسانی شۆڕشی گوڵان دەکەینەوە، بە رێز و شکۆدارییەوە شەھیدانی نەمر و ھەموو ئەو قارەمان و جوامێرانە بەبیردەھێنینەوە کە لەم شۆڕشە مەزنەدا گیان و خوێنیان لەپێناو ئازادیدا بەخشی.

شۆڕشی گوڵان وەکو درێژەپێدەری شۆڕشی مەزنی ئەیلوول بە رابەرایەتیی بارزانیی نەمر، نموونەیەکی بێ وێنە بوو لە ئیرادەی گەلێک کە بۆ رەتکردنەوەی ستەم و داگیرکاری، ھەرگیز کۆڵی نەداوە. لە شۆڕشی گوڵاندا گەلی کوردستان دووبارە سەلماندی کە لەپێناو پاراستنی بوون و ئازادیی خۆیدا، بۆ ھەموو قوربانیدانێک ئامادەیە.

لەم یادەدا دووپاتی دەکەینەوە کە ئەرکی ھەموومانە میراتی شەھیدان و فیدراڵی و دەستکەوتە دەستوورییەکانی بپارێزین و بە یەکڕیزی و ھاوکاری درێژە بە ڕێگەی ئەوان بدەین. با یادی شۆڕشی گوڵان ھاندەری زیاترمان بێت بۆ تەبایی و پێکەوەیی، تا بە کاری ھاوبەش و ھاریکاری، بەرەو داھاتوویەکی باشتر ھەنگاو بنێین.

بەرز و شکۆدار بێت یادی شۆڕشی گوڵان، دروود بۆ گیانی پاکی شەھیدان، سڵاو لە ھەموو پێشمەرگە قارەمانەکانی کوردستان.