زیندانییەک لە عێراق دوو ڕۆژ پێش ئازادبوونی گیان لەدەست دەدات

ئاڤا نیوز

لە پارێزگای ئەنبار سزادراوێک کە ماوەی 10 ساڵە لە زیندان بووە و بڕیاربوو دوو ڕۆژی دیکە بەیاسای لێبوردنی گشتی ئازاد بکرێت، لە ڕووداوێکدا گیانی لەدەستدا. کەسوکارەکەشی دەڵێن، شوێنەواری ئەشکەنجە لەسەر جەستەی هەیە.

وێنە گەورەکە: یاسای لێبوردنی گشتی کە ماوەی سێ مانگە کەوتووەتە بواری جێبەجێکردنەوە، تائێستا زیاتر لە 23 هەزار کەس لێی سوودمەندبووە، کە زۆرینەیان خەڵکی سوننە مەزهەبن و بەتۆمەتی پەیوەست بە تیرۆرەوە دەستگیرکراون.

زانیاریی بەدەستهاتوو: ئەو هاووڵاتییە ناوی حەیدەر سعوود عەلیاوییە، خەڵکی شاری ڕوومادییە و خاوەنی چوار منداڵە، شەممەی ڕابردوو تەرمەکەی ڕادەستی خێزانەکەی کراوەتەوە و بڕیاربوو ئەمڕۆ دووشەممە ئازادبکرێت.

لێدوانی فەرمی: دایکی حەیدەر دەڵێت، لە زیندانەوە پەیوەندییان پێوەکراوە و وتوویانە وەرن تەرمی کوڕەکەتان ببنەوە، بەقسەی بەرپرسانی زیندانەکەش "کوڕەکەم لەکاتی گواستنەوەی بۆ زیندانێکی دیکە لەهۆش خۆی چووە، بەڵام کەمتەرخەمیی هەبووە و شوێنی ئەشکەنجە لەسەر جەستەی هەیە، بۆیە لە مافی کوڕەکەم خۆش نابین، داوای سەیرکردنەوەی کامێراکان و لێپرسینەوە لەوانە دەکەین کە کەمتەرخەم بوون".

ئەوەی پێویستە بیزانیت: حەیدەر مەرگی پێش ئازادبوونەکەی کەوت، بەتایبەتیش کە 10 ساڵ لەومەبەر لە زیندانێکی بەغدا زیندانیی کرابوو، بەهۆی ئەوەی هیچ بەڵگەیەکیشی لەسەر نەبووە بەر یاسای لێبوردنی گشتی کەوتبوو.