نێچیرڤان بارزانی: پەیامی دڵنیایی بە مەسیحییەکان دەدەین میراتی باب و باپیرانیان پارێزراوە

ئاڤا نیوز

 

لە کۆنفرانسی ساڵانەی زانکۆی کاسۆلیکیی هەولێر، نێچیرڤان بارزانی، سەرۆکی هەرێمی کوردستان پەیامێکی پێشکەش کرد و دڵنیایی بە مەسیحییەکان دا کە کەنیسە و شوێنە ئاینییەکانیان پارێزراو دەبێت.

 

وێنە گەورەکە: زانکۆی کاسۆلیکیی هەولێر، ساڵانە کۆنفراسی تایبەت بە کاروباری مەسیحییان لە هەرێمی کوردستان ئەنجام دەدات، بۆ ئەمساڵ پرسی کۆنفراسەکە تایبەت بوو بە بەڕێوەبردن و ئیدارەدانی وەقفی کەنیسەکان.

 

لێدوانی فەرمی: نێچیرڤان بارزانی، سەرۆکی هەرێمی کوردستان لە کۆنفراسەکە وتی، لە سەرەتای دامەزراندنی پەرلەمانی کوردستان داکۆکیمان لە بەشداری پێکهاتەکان کرد لە بەڕێوەبردنی حکومەت و پەرلەمان، ئەو بەیەکەوە ژیانەی لە کوردستان هەیە هێزێکی زۆری بە هەرێمەکەمان بەخشیووە، بووەتە مایەی دەوڵەمەندی و سەقامگیری. 

 

سەرۆکی هەرێمی کوردستان لە کۆنفرانسەکە ئەمانەشی وت:

- کاتێک داعش لە ساڵی 2014 هێرشی بۆ ناوچەکان دەستپێکرد، مەسیحییەکان بە ئازار و مەینەتی زۆر تێپەڕین، هەرێمی کوردستان بە سەرکردایەتی و خەڵکەکەی دەریانخست دەبنە پەناگە و نیشتمانی دووەم بۆیان.

- کەنیسە و شوێنەوارەکانی مەسیحییەکان، بەشێکن لە دەوڵەمەندی شارستانی کوردستان و ناوچەکە.

- پاڵپشتی لە خێرا دەرکردنی یاسایەک بە ئەوقافی مەسیحییەکان دووپات دەکەینەوە، ئەم یاسایە دەبێتە گرەنتییەکی یاسایی و دەستووری بۆ پاراستنی میراتە مێژووییەکانی مەسیحییەکان لە عێراق.

- داوا لە سەرۆکی کەنیسەکان دەکەم، بەردەوام بن لە داڕشتنی یاسای باری کەسی مەسحییەکان، ئەم یاسایە دەبێتە بنەمایەکی گرنگ لە پاراستنی تایبەتمەندییەکانی مەسیحییەکان.

- مەسیحییەکان و پێکهاتەکان لە کوردستان میوان نین، بەڵکو خاوەن و هاوبەشی ڕەسەنی ئەم نیشتمانەن.