تەنیا 250 مامۆستا و فەرمانبەری خوێندی کوردی لە کەرکووک ماون لە هەژماری من تۆمار بکرێن

ئاڤا نیوز

 

لە دوو ڕۆژی داهاتوودا تەواوی مامۆستا و فەرمانبەرانی خویندنی کوردی لە کەرکووک، خۆیان لە "هەژماری من" تۆمار دەکەن.

 

وێنە گەورەکە: وەزارەتی دارایی و ئابووریی هەرێمی کوردستان مووچەخۆرانی ئاگادارکردووەتەوە لەوەی، ئەگەر تاوەکوو 1-6-2025، دەست بە مامەڵەی خۆتۆمارکردن لە "هەژماری من" نەکەن، ئەوا مووچەیان ڕادەگیرێت.

 

چیرۆکی سەرەکی: لە کۆی نزیکەی هەشت هەزار مامۆستا و فەرمانبەری خوێندنی کوردی لە کەرکووک، نزیکەی حەوت هەزار و 750 کەس خۆیان لە "هەژماری من" تۆمار کردووە، چاوەڕوانیش دەکرێت لە دوو ڕۆژی داهاتوودا هەموویان لە کەرکووک تۆمار بکرێن.

 

لێدوانی فەرمی: کامەران عەلی، بەڕێوەبەری خوێندنی کوردی لە کەرکووک بە ئاڤای ڕاگەیاند: لە ماوەی پێنج مانگی ڕابردوودا پێنج هەزار و 900 کەس خۆیان لە "هەژماری من" تۆمار کردووە، هەروەها ڕۆژانە نزیکەی 300 کەس لە بانکی چەمچەماڵ کارتەکانیان  وەردەگرنەوە و پرۆژەکە پێشوازییەکی باشی لێکراوە.

 

ئەوەی پێویستە بیزانیت: بە گوتەی کامەران عەلی: لە چەند ڕۆژی ڕابردوودا نزیکەی هەزار 700 کەسی دیکە فۆرمەکانیان پڕکردووەتەوە، بەمەش تەنیا نزیکەی 250 کەسێک ماون فۆرمەکانیان پڕ بکەنەوە، بۆیە چاوەڕوان دەکرێت لە دوو ڕۆژی داهاتوودا تەواوی مامۆستا و فەرمانبەران خۆیان لە هەژمارەکە تۆمار بکەن.

 

بۆچی گرنگە: بە ئەلیکترۆنیکردنی مووچەی مامۆستا و فەرمانبەرانی خوێندنی کوردی  لە کەرکووک، کارئاسانی تەواویان بۆ دەکات، چونکە لە ڕابردوودا دەبوو بانکی ناوەندیی پارەی مووچەکانیان لە هەولێرەوە ڕەوانەی سلێمانی بکات، لەوێشەوە ڕەوانەی کەرکووک بکرێت و پێیان بدرێت، بەڵام بە خۆتۆمارکردنیان لە "هەژماری من"، ڕزگاریان دەبێت و ئەو کێشەیان چارەسەر دەکرێت.