دوو بەڕێوەبەری گشتی لە وەزارەتی گواستنەوە لە پۆستەکانیان دوور دەخرێنەوە

ئاڤا نیوز

لە کۆبوونەوەی ئەنجوومەنی وەزیرانی عێراق بڕیاردرا بە دوورخستنەوەی دوو بەڕێوەبەری گشتی لە وەزارەتی گواستنەوەی عێراق و ڕەوانەکردنیان بۆ دادگەی تایبەتمەند.

وێنە گەوەرەکە: ئەنجوومەنی وەزیرانی عێراق لە کۆبوونەوەی ئەمڕۆیدا ڕاسپاردەکانی لیژنەی لێکۆڵینەوە لە دۆسیەی نۆژەنکردنەوەی هێڵی ئاسنی پەسەند کرد و بڕیاری دوورخستنەوەی دوو بەڕێوەبەری گشتی لە پۆستەکانیان درا.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە کۆبوونەوەکەدا ڕاسپاردەکانی لیژنەی فەرمانی دیوانی ژمارە 7ی ساڵی 2025 پەسەند کرا سەبارەت بەو پێشێلکارییانەی لە ڕاپۆرتی لێکۆڵینەوەی دەستەی دەستپاکی فیدراڵی جێگیرکراون، لە ڕێککەوتی 4ی تەمموزی 2024، پەیوەندیدار بە لێکۆڵینەوە لە دۆسیەی نۆژەنکردنەوەی هێڵی ئاسن و گرێبەستە پەیوەندیدارەکان.

چی ڕوویدا: لە کۆبوونەوەکە بڕیاردرا بە دوورخستنەوەی ئەو کەسانەی لە خوارەوە ناویان هاتووە، بەهۆی ئەنجامنەدانی ئەو ئەرکانەی کە پێیان سپێردراوە کە لەلایەن لیژنەی لێکۆڵینەوەوە پێشنیازی دوورخستنەوەیان دراوە:

- یەعقوب حوسێن سالم، بەڕێوەبەری گشتی بەشی یاسایی لە وەزارەتی گواستنەوە.

- عەباس ناسر مەجید، بەڕێوەبەری گشتیی بەشی گرێبەست و مۆڵەت لە وەزارەتی گواستنەوە.

لە هەمان کاتدا: بڕیاردرا ڕاپۆرتەکە ئاراستەی دەستەی دەستپاکی فیدراڵی بکرێت بە مەبەستی تەواوکردنی ڕێکارەکانی لێکۆڵینەوە لەلایەن دادگای پەیوەندیدارەوە.