ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان ڕادەگەیێنرێت

ئاڤا نیوز

 

وەزیری پەروەردە ڕایدەگەیێنێ، سبەی یان سەرەتای هەفتەی داهاتوو ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان لەڕێگەی ئەپلیکەیشنێکی تایبەت بە وەزارەتی پەروەردەوە ڕادەگەیێنرێت.

 

لێدوانی فەرمی: د. ئالان حەمە سەعید، وەزیری پەروەردەی حکومەتی هەرێمی کوردستان بە ئاڤای ڕاگەیاند: سبەی یان سەرەتای هەفتەی داهاتوو ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان لەڕێگەی ئەپلیکەیشنی هەڵسەنگاندنەوە بڵاو دەکرێتەوە.

 

وەزیری پەروەردە داوایەک لە قوتابیان دەکات، کە "پێویست ناکات فشار لەسەر ئەپلیکەیشنەکە دروست بکەن و کەی ئەنجامەکان ڕاگەیێنران، با سەردانی ئەپلیکەیشنەکە بکەن. هەموو قوتابییەکیش کۆدێکی تایبەت بە خۆی هەیە بۆ وەرگرنتەوەی ئەنجامەکان."

 

لەلایەکی دیکە: لەبارەی تاقیکردنەوەکانی پۆلی دوانزە، وەزیری پەروەردە بە ئاڤای گوت: هەموو ئامادەکارییەک بۆ بەڕێوەچوونی تاقیکردنەوەکانی پۆلی 12 کراوە.

 

ئەوەی پێویستە بیزانیت: هەرچی پەیوەستە بە پرسیارەکانی تاقیکردنەوەکان، ئالان حەمەسەعید دەڵێت، هیچ کەسێک مافی ئەوەی نییە پرسیارەکانی پۆلی 12ببینێت و بەرەبەیانیی ڕۆژی تاقیکردنەوە پرسیارەکانی پۆلی 12 دەگەنە هۆلەکانی تاقیکردنەوە، هاوکات وێنەگرتنی هەر پرسیارێک دەبێتە هۆی بێبەشکردنی قووتابی لە تاقیکردنەوە و نمرەکانی.

 

بەشێکی دیکە لە قسەکانی وەزیری پەروردە:

-چیتر مەراسیم بۆ قوتابییە یەکەم و دووەم و سێیەمەکانی پۆلی 12 ناکەین.
-ئەمساڵ گۆڕانکاری لە پرۆسەی خوێندندا دەکەین.
-لە کابینەی نۆیەمدا 214 قوتابخانە دروستکراون.
-زیاتر لە هەزار و 670 قوتابخانە نۆژانکراونەتەوە.
-ژمارەی خانەنشینبوونی مامۆستایان تا کۆتایی مانگی هەشت دەگاتە زیاتر لە حەوت هەزار و 500 مامۆستا.