هاوپەیمانیی ئیدارەی دەوڵەت کۆ دەبێتەوە

ئاڤا نیوز

هاوپەیمانیی ئیدارەی دەوڵەت، کە هێزەکانی پێکهێنەری حکومەتی ئێستای عێراق لە خۆ دەگرێت، بۆ تاوتوێی پرسی کاندیدی سەرۆکوەزیران و سەرۆککۆماری عێراق و شایستە دەستوورییەکان کۆ دەبێتەوە.

زانیاریی تایبەت: سەرچاوەیەکی ئاگادار بە ئاڤا میدیای ڕاگەیاند، بڕیارە سبەی یەکشەممە 8ـی شوبات، هاوپەیمانیی ئیدارەی دەوڵەت لە کۆشکی حکوومەت، بە سەرپەرشتیی محەممەد شیاع سوودانی، سەرۆکوەزیرانی عێراق کۆ ببێتەوە. هاوکات لە هەرێمی کوردستانیشەوە، هەریەک لە نێچیرڤان بارزانی، سەرۆکی هەرێمی کوردستان و بافڵ تاڵەبانی، سەرۆکی یەکێتیی نیشتمانیی کوردستان، هاوشانی سەرۆک و سەرکردەی لایەنە شیعی و سوننییەکان بەشداری لە کۆبوونەوەکەدا دەکەن.

زانیاریی زیاتر: بە گوتەی ئەو سەرچاوەیە، کۆبوونەوەکەی هاوپەیمانیی ئیدارەی دەوڵەت پەیوەست دەبێت بە پرسی کاندیدی سەرۆکوەزیران و سەرۆککۆماری عێراق و تەواوکردنی شایستە دەستوورییەکان لە زووترین کاتدا.

لە لایەکی دیکەوە: تاوەکوو ئێستا پەرلەمانی عێراق وادەیەکی بۆ هەڵبژاردنی سەرۆککۆمار دیار نەکردووە؛ ئەمەش لە دوای دوو جار شکستی دانیشتنەکان بەهۆی نەبوونی ڕێژەی یاساییی و ڕێکنەکەوتنی لایەنەکان لەسەر کاندیدێکی هاوبەش.