بەهۆی هێرشەکانی ڕووسیا بۆ سەر ئۆکراینا دوو فڕۆکەخانەی پۆڵەندا داخران

ئاڤا نیوز

دەسەڵاتدارانی پۆڵەندا دوو فڕۆکەخانەی نێودەوڵەتییان داخست، دوای ئەوەی ڕووسیا بە 440 مووشەک و درۆن هێرشی کردە سەر ژێرخانی کارەبای ئۆکراینا.

چیرۆکی سەرەکی: ئەمڕۆ شەممە 7-2-2026، ڕووسیا هێرشێکی نوێ و بەرفراوانی کردە سەر دامەزراوەکانی تۆڕی کارەبای ئۆکراینا، ئەمەش وای کرد پۆڵەندا وەک ڕێکارێکی خۆپارێزی، ئۆپەراسیۆنی فڕۆکەخانەکانی "لوبلین" و "ڕیزسۆڤ" لە باشووری ڕۆژهەڵاتی وڵاتەکەی ڕابگرێت. سەرەڕای ئەوەی هەردوو وڵات بە نێوەندگیریی ئەمریکا خەریکی گفتوگۆی ئاشتین، بەڵام مۆسکۆ بە ئامانجگرتنی ژێرخانی وزەی ئۆکراینای چڕتر کردووەتەوە، ئەمەش پۆڵەندای ناچار کرد فڕۆکە جەنگییەکانی بخاتە حاڵەتی ئامادەباشییەوە بۆ پاراستنی ئاسمانی وڵاتەکەی.

لێدوانی فەرمی: ڤۆلۆدێمیر زێلێنسکی، سەرۆکی ئۆکراینا لەبارەی هێرشەکەوە وتی: ڕووسیا 400 فڕۆکەی بێفڕۆکەوان و 40 مووشەکی بۆ سەر دامەزراوە کارەباییەکانمان بەکار هێناوە.

ڕاگەیێنراوی فەرمی: هاوکات سوپای پۆڵەندا ڕایگەیاند: فڕۆکەکانمان ئۆپەراسیۆنیان لە ئاسمانی وڵاتدا ئەنجام داوە؛ ئۆپەراسیۆنەکە کۆتایی هاتووە و هیچ پێشێلکارییەکی ئاسمانی ڕووی نەداوە.