پەیامێکی نوێ لە حکومەتەوە لەبارەی کارەبای 24 کاتژمێری: نابێت خەڵک زەرەرمەند بێت

ئاڤا نیوز

 

وتەبێژی حکومەتی هەرێمی کوردستان ڕایدەگەیێنێ،  زۆرینەی پڕۆژەکانی حکومەت لە سەرەتاوە دەنگی دژ هەبووە، بەڵام دواتر دەرکەوتووە لە خزمەتی خەڵکە. لەبارەی پرۆژەی ڕووناکیشەوە دەڵێت،  "نابێت خەڵک لە پڕۆژەی ڕووناکی زەرەرمەند بن."

 

وێنە گەورەکە: پڕۆژەی ڕووناکی کە کارەبای 24 کاتژمێری بۆ هاووڵاتییان دابین دەکات، لە بەشێکی زۆری شارە گەورەکان تەواوکراوە، بڕیاریشە لە کۆتایی ساڵی 2026 بگاتە هەموو هەرێمی کوردستان.

 

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان بە ئاڤا میدیای ڕاگەیاند، "کارەبای 24 کاتژمێری پرۆژەیەکی گرنگ و پێویستە بۆ کوردستان و بۆ بەرژەوەندیی خەڵکە. حکومەت پرۆژەی زۆر گەورەی لە بەرژەوەندیی خەڵک دەستپێکردووە.

 

پێشەوا هەورامانی دەشڵێت، زۆرینەی پڕۆژەکانی حکومەت لە سەرەتاوە دەنگی دژ هەبووە، بەڵام دواتر دەرکەوتووە لە خزمەتی خەڵکە. بە دروستکردنی ژێرخانیش، کێشەکانی هەرێمی کوردستان چارەسەر دەبن. وتەبێژی حکومەتی هەرێمی کوردستان گوتیشی، "نابێت خەڵک لە پڕۆژەی ڕووناکی زەرەرمەند بن".

 

ئەوەی پێویستە بیزانیت: بەگوێرەی داتاکانی حکومەتی هەرێمی کوردستان، تا ئێستا زیاتر لە 600 هەزار هاوبەشی کارەبا لەو سیستمە سوودمەند بوونە، ئەمە لە کاتێکدایە تێکڕای هاوبەشانی کارەبا لە هەرێمی کوردستان گەیشتووەتە ملیۆنێک و 885 هەزار و 270 هاوبەش.