باندێکی بازرگانیکردن بە جەستەی مرۆڤ لە سلێمانی دەستگیر کرا

ئاڤا نیوز

دەزگای ئاسایشی هەرێمی کوردستان باندێکی بازرگانیکردن بە جەستەی مرۆڤیان دەستگیرکرد کە کاریان فریودانی خەڵک و مامەڵەکردن بووە بە گورچیلەوە.

چیرۆکی سەرەکی: باندێکی بازرگانیکردن بە جەستەی مرۆڤ لە سلێمانی دەستگیرکران، باندەکە کاریان هەڵخەڵەتاندنی خەڵک بووە، هاووڵاتییان و کەسوکاری نەخۆشیان فریوداوە و بەناوی پەیداکردنی گورچیلەوە بە نرخێکی هەرزان پارەیان وەرگرتووە.

ڕاگەیێنراوی فەرمی: دەزگای ئاسایشی هەرێمی کوردستان، لە ڕاگەیێنراوێکدا بڵاویکردەوە، "بەڕێوەبەرایەتی لێکۆڵینەوەی دەزگای ئاسایشی هەرێمی کوردستان بەهەماهەنگی بەڕێوەبەرایەتیی ئاسایشی پارێزگای سلێمانی، باندێکی هەڵخەڵەتاندنیان دەستگیرکرد کە خەڵکیان فریوداوە بەفرۆشتنی گورچیلە."

زانیاریی زیاتر: دەزگای ئاسایشی هەرێمی کوردستان ڕاشیگەیاندووە، "لەسەر سکاڵای هاووڵاتییان و بە بڕیاری دادوەری لێکۆڵینەوەی ئاسایش، بەڕێوەبەرایەتیی لێکۆڵینەوەی دەزگای ئاسایشی هەرێمی کوردستان، بەدواداچوونی ووردی کرد، لەڕۆژانی 7 و 8ـی ئەم مانگە، توانرا لەشاری سلێمانی باندێکی چوار کەسی دەستگیربکەن کەبڕی 32 ملیۆن دیناریان لە پێنج خێزان وەرگرتووە و فریویان داون بەوەی گورچیلە لەبەرامبەر بڕێک پارەدا دەفرۆشن". لە ئێستادا تۆمەتباران بەماددەی 456 ڕاگیراون و لێکۆڵینەوە لەدۆسیەکانیان بەردەوامە.

لێدوانی فەرمی: عەقید سەلام عەبدولخالق، وتەبێژی ئاسایشی پارێزگای سلێمانی، بە ئاڤا میدیای ڕاگەیاند، "لەسەر بنەمای زانیاریی و چاودێریکردنی ورد باندەکە دەستگیرکراون، ئەندامانی ئەم باندە لە نزیک نەخۆشخانەکان بەتایبەت نەخۆشخانەکانی گورچیلە بە خەڵک و کەسوکاری نەخۆشیان وتووە، دەتوانین بە نرخێکی هەرزان گورچیلەتان بۆ پەیدا بکەین، بەم قسانە خەڵکیان فیوداوە و دەیان ملیۆن دیناریان لە خەڵک کێشاوەتەوە".

"باندەکە فریودەربوون، بازرگانییان بەناوی فرۆشتنی جەستەی مرۆڤەوە کردووە و لە زۆرینەی کاتەکانیشدا گورچیلە هەر نەبووە، پارەیان لە خەڵک وەرگرتووە و دواتر خۆیان حەشارداوە و پارەکەیان خواردووە".