فەرمانبەرانی حكومی ئاشنای ناسینەوەی بەرهەمی ئۆرجیناڵ و لاساییكراو دەكرێن

ئاڤا نیوز

لەپێناو كۆنتڕۆڵكردنی بازاڕ و دەستگرتن بەسەر كاڵای ساختە و كوالێت نزم، فەرمانبەرانی بەڕێوەبەرایەتییەكانی چاودێریی بازرگانی و هێمای بازرگانی سەر بە وەزارەتی بازرگانی و پیشەسازیی هەرێمی كوردستان، ئاشنای ناسینەوەی بەرهەمی ئۆرجیناڵ و لاساییكراو دەكرێن.

چیرۆكی سەرەكی: وەزارەتی بازرگانی و پیشەسازیی حكومەتی هەرێمی كوردستان، بە هاوكاریی كۆمپانیای ئازووقە، بریكاری سەرەكیی نیولیڤەر، وۆركشۆپێكی بەناونیشانی ڕێگاکانی ناسینەوەی بەرهەمی ئۆرجیناڵ و لاسایيکراو بۆ ژمارەیەك فەرمانبەری تایبەتمەند بە چاودێریی بازرگانی و هێما بازرگانییەكان ڕێكخست.

لێدوانی فەرمی: سەروەر كەمال هاواری، بریكاری وەزارەتی بازرگانی و پیشەسازی بۆ كاروباری بازرگانی كە سەرپەرشتی وۆركشۆپەكەی دەكرد، ڕایگەیاند، لەچوارچێوەی ئەركەكانی فەرمانبەر بۆ كۆنتڕۆڵكردنی بازاڕ و چۆنیەتی ناسینەوەی بەرهەمی ئۆرجیناڵ و جیاكردنەوەی لە بەرهەمی لاساییكراو و چۆنیەتی تۆماركردنی هێما بازرگانییەكان، بەپێویستمان زانی ئەو وۆركشۆپە بۆ فەرمانبەران ڕێكبخەین كە تێیدا بەشداربووان شارەزای زانیاریی و ئەزموونی نوێ لەم بوارە كران.