ئەمریکا: پشتگیریکردنی کوردستان بنەمایەکی سەرەکییە بۆ ئێمە

ئاڤا نیوز

ئەمریکا و هەرێمی کوردستان جەخت لە هاوبەشی بەهێزی نێوانیان دەکەنەوە، و نێچیرڤان بارزانیش دەڵێت، پابەندین بە هاوبەشی بۆ ئاشتی، سەقامگیری و هاوبەشی بەهێز لە نێوان هەرێمی کوردستان و ئەمریکا.

چیرۆکی سەرەکی: له‌ په‌يوه‌ندييه‌كی تەلەفۆنی مارکۆ ڕۆبیۆ، وەزیری دەرەوەی ئەمریکا و نێچیرڤان بارزانی، سەرۆکی هەرێمی کوردستان، جەختیان له‌ بره‌ودان به‌ پەیوەنديی ستراتیژيی ئەمه‌ریکا و هەرێمی کوردستان کردەوە، هەروەها باسيان له‌ هاريكاريى بوارى ئابوورى و وزه‌ و گرنگيی بەردەوامبوونی هەماهەنگیى نێوانيان کرد بۆ پشتگيريى سەقامگیری و ئارامى لە عێراق، سووریا و ناوچەکە به‌گشتی.

بڵاوکراوەی فەرمی: نێچیرڤان بارزانی، سەرۆکی هەرێمی کوردستان لە تۆڕی کۆمەڵایەتی ئێکس ڕایگەیاند، پێزانینی هەیە بۆ پەیوەندییە تەلەفۆنییەکەی ئەمشەوی مارکۆ ڕوبیۆ، وەزیری دەرەوەی ئەمریکا.

پابەندبوونی هاوبەشم بۆ ئاشتی، سەقامگیری و هاوبەشی بەهێز لەنێوان هەرێمی کوردستان، عێراق و ئەمریکا دووپاتکردەوە و پێشهاتەکانی کوردستان، عێراق و ناوچەکەمان تاوتوێ کرد.

سوپاس و پێزانینی قووڵی خۆمان بۆ پشتگیرییە چەسپاوەکانی ئەمریکا لە ماوەی ساڵانی ڕابردوودا گەیاند.

لەلایەکی دیکەوە: مارکۆ ڕوبیۆ، وەزیری دەرەوەی ئەمریکا لە پەیوەندییە تەلەفۆنییەکەدا، جەختی لەوە کردەوە کە پشتگيريی ئەمریکا بۆ هەرێمی کوردستان، به‌ بنەمایەکی سەرەکيی پەیوەنديی ستراتيژيى ئەمریکا لەگەڵ عێراقدا دەمێنێتەوە.