وتەبێژی بارەگای بارزانی: هەر بڕیارێک لە کۆبوونەوەکەی سبەی بدرێت بڕیارێکی بەهێز دەبێت

ئاڤا نیوز

بڕیارە سبەی شەممە لە پیرمام، کۆبوونەوەی حیزبە کوردستانییەکان بکرێت، بۆ وەرگرتنی ڕاوبۆچوونیان بەرامبەر بە بڕیاری بەغدا سەبارەت بە بڕینی مووچە، وتەبێژی بارەگای بارزانیش دەڵێت، داوەتنامە بۆ هەموو لایەنەکان نێردراوە و سبەی هەر بڕیارێک لەو کۆبوونەوەیە بدرێت بڕیارێکی بەهێزی کوردستان دەبێت.

وێنە گەورەکە: کۆتایی هەفتەی پێشوو وەزارەتی دارایی حکومەتی عێراق لە نووسراوێکدا بڕیاری ڕاگرتنی مووچەی فەرمانبەرانی هەرێمی کوردستانی دەرکرد. لە کاردانەوەی بڕیارەکە، سبەی لەسەر داواکاری پارتی دیموکراتی کوردستان و بە سەرپەرشتی سەرۆک بارزانی کۆبوونەوەیەکی فراوان لەنێوان حیزبە کوردییەکان دەکرێت.

لێدوانی فەرمی: د. خالیدە خەلیل، وتەبێژی بارەگای بارزانی بە ئاڤا میدیای وت، داوەتنامە بۆ هەموو لایەنەکان ڕۆیشتووە و هیوادارین هەمووان یەک دەنگ و یەکڕیز بن، خەڵک و لایەنە سیاسییەکانیش تێگەیشتوون ئەمەی بەغدا دەیکات بابەتێکی سیاسیە.

وتەبێژی بارەگای بارزانی ئەمانەشی وت:

ئەمەی بەغدا دەیکات تیرۆرە بەرامبەر خەڵکی کوردستان، ئەمە دژایەتیکردنی فیدڕاڵییە، دژایەتی پێشکەوتنی هەرێمی کوردستانە.

هەرێمی کوردستان هەموو داواکارییەکانی حکومەتی عێراقی جێبەجێکردووە.

ئەوانەی تا ئێستا بە فەرمی وتوویانە لە کۆبوونەوەکە بەشدار نابین تەنیا ڕەوتی هەڵوێست و نەوەی نوێ بەشدار نابن.

تەنیا یەک لایەنی سیاسی لە عێراق دەیەوێت خۆی لەسەر تەواوی عێراق فەرز بکات.