ئەشواق جاف: بڕینی مووچەی فەرمانبەرانی هەرێمی کوردستان پلان بۆ داڕێژراوە

ئاڤا نیوز

 

ئەندامێکی سەرکردایەتیی پارتی دیموکراتی کوردستان باس لەوەدەکات بڕینی شایستەی دارایی خەڵکی هەرێمی کوردستان بابەتێکی پلان بۆ داڕێژراوە و چەندین ساڵە کاری لەسەر دەکرێت. 

 

وێنە گەورەکە: بڕینی بەشە بودجەی مووچەخۆرانی هەرێمی کوردستان لەلایەن وەزیری دارایی عێراقەوە، کاردانەوەی ناوخۆی و عێراقی بەدوای خۆیدا هێناوە، بەشێک لە لایەنە سیاسییەکانی عێراقیش ئەو هەنگاوە بە نەرێنی وەسف دەکەن بەوەی زیان بە بەرژەوەندی هاوبەشی هەردوولا دەگەیەنێت. 

 

لێدوانی  فەرمی: د. ئەشواق جاف، ئەندامی سەرکردایەتیی پارتی دیموکراتی کوردستان بە ئاڤا میدیای ڕاگەیاند: بڕینی مووچەی هاووڵاتییانی هەرێمی کوردستان پەیوەندیی بە ئەقڵییەتی بەڕێوەبردنی عێراقەوە هەیە کە قبوڵ ناکات کورد هاووڵاتییەکی پلە یەک بێت، ئەمەش بابەتێکی پلان بۆ داڕێژراوە و لە ساڵی 2003وە کاری لەسەر دەکرێت بۆ لێدان لە بەندە دەستوورییەکان. 

- ئەو ئەندامەی سەرکردایەتیی پارتی دیموکراتی کوردستان ئەوەشی ئاشکرا کرد، سەرەتا لە بڕینی شایستە داراییەکانی پێشمەرگەوە دەستیان پێکرد، دواتر بەشە بودجەی تەرخانکراوی ماددەی 140یان بڕی، دواتر شایستەی دارایی مووچەخۆران و جووتیاران، دوای ئەوەش نەدانی شایستەی قوربانییانی هەڵەبجە و کەسوکاری ئەنفالکراوان، لە کۆتایی هەموو ئەوانەش بەبێ هەبوونی هیچ بڕگەیەکی دەستووری بڕیاری بڕینی مووچەی مووچەخۆرانی کوردستانیان دەرکرد. 

باکگراوند: ڕۆژی چوارشەممە، 28-5-2025، وەزارەتی دارایی عێراق بە واژۆی تەیف سامی، نووسراوێكی دەركرد بۆ ڕاگرتنی ناردنی مووچەی مووچەخۆرانی هەرێمی كوردستان لە مانگی پێنجەوە تا کۆتایی ساڵ کە هەشت مووچە دەکات.