سوودانی لە گرووپەکانی وەتسئەپی چوارچێوەی هەماهەنگی دەردەکرێت

ئاڤا نیوز

لەکاردانەوەی بڵاوبوونەوەی بڕیاری پۆلێنکردنی حیزبوڵڵا و حووسییەکان وەک "تیرۆریست" لە ڕۆژنامەی وەقائیعی عێراقی، ناوی محەممەد شیاع سوودانی، سەرۆکوەزیرانی عێراق، لە گرووپەکانی وەتسئەپی تایبەت بە سەرکردەکانی چوارچێوەی هەماهەنگی سڕایەوە.

چی ڕوویدا: سەرچاوەیەکی ئاگادار ئاشکرای کرد دوای ئەو مشتومڕە بەرفراوانەی بەهۆی بڵاوکردنەوەی بڕیارەکە دروست بوو، ناوی سەرۆکوەزیران لە گرووپەکانی چوارچێوەی هەماهەنگی لابراوە، ئەمەش وەک کاردانەوەیەک بەرامبەر بەو ڕووداوانە. وێنەیەکی دزەپێکراو لە وەتسئەپ، دەریدەخات کە (هومام حەمودی)، ناوی سوودانی لە گرووپەکەدا سڕیوەتەوە.

ئەم هەنگاوە لە کاتێکدایە کە چوارچێوەی هەماهەنگی لەناوخۆدا ناکۆکیی تووندی لەسەر بڕیاری پۆلێنکردنەکە هەبوو، پێش ئەوەی ئەمینداریەتی گشتیی ئەنجوومەنی وەزیران لە بڕیارەکە پاشگەزبێتەوە و جەخت بکاتەوە کە ڕەزامەندی عێراق تەنیا بۆ قەوارەکانی پەیوەندیدار بە داعش و قاعیدە بووە.

ئەوەی لەبارەیەوە دەگوترێت: ئەم دەرکردنە وەک گوشارێک بۆ سەر سوودانی لێکدەدرێتەوە، بەتایبەتی دوای ئەوەی لیژنەیەکی لێکۆڵینەوەی پێکهێنا بۆ دیاریکردنی وردەکارییەکانی بڵاوکردنەوەی ئەو ناوانە لە ڕۆژنامەکەدا. دەنگۆی تێکچوونی کارگێڕی و دزەپێکردنی بێمەبەست سەبارەت بەو بڕیارە بڵاوبوونەتەوە.

لەلایەکی دیکەوە: چەند سەرچاوەیەکی سیاسی بۆ میدیا عێراقییەکان ڕایانگەیاندووە کە دەنگۆکانی دەرکردنی ژمارەی سوودانی لە گرووپە وەتسئەپەکان نادروستن و ئەو وێنانەی كە بڵاوبوونەتەوە دروستكراون.