دابەشکردنی شەش مووچەی ئیکرامییەی خانەنشینان دەستی پێ کردەوە

ئاڤا نیوز

قۆناغێکی دیکەی دابەشکردنی شەش مووچەکەی ئیکرامییە لە هەرێمی کوردستان دەستی پێکرد. ئەم مانگە پێنج ملیار دینار بۆ خانەنشینانی سنووری هەولێر تەرخان کراوە

وێنە گەورەکە: شەش مووچەکەی ئیکرامییە وەزارەتی دارایی کوردستان خۆی دابەشی دەکات، ئەو خانەنشینانە دەگرێتەوە ئەمساڵ خانەنشین بوون واتا چوار موالیدەکە، هەر خانەنشینێک 180 ڕۆژ مۆڵەتی کۆکراوەی هەبێت شەش مووچەی بنەڕەتی پێدەدرێت.

لێدوانی فەرمی: خەتاب سابیر، بەڕێوەبەری خەزێنەی هەولێر بە ئاڤای وت: ئەم مانگە پێنج ملیار دینار بۆ خانەنشینانی سنووری هەولێر تەرخان کراوە، سەدان خانەنشین سوودمەند دەبن و شەش مووچەکەیان پێدەدرێت، دابەشکردنیشی دەستی پێکردووە، دەتوانن سەردانی ئەو بانکە بکەن کە مووچەی لێ وەردەگرن لەوێ پێیان دەدرێت.

زانیاریی زیاتر: بەگوتەی خەتاب سابیر، لە سلێمانی و دهۆکیش، ئەو خانەنشینانەی تا ئێستا شەش مووچەکەیان وەرنەگرتووە، لە سبەینێوە دەتوانن سەردانی بەڕێوەبەرایەتییەکەی خۆیان بکەن، لەوێ نووسراوێکیان بۆ دەکرێت و دەچنە فەرمانگەی خانەنشینی، کە مامەڵەیان تەواو بوو، پارەکەیان بۆ خەرج دەکرێت.

ئەوەی پێویستە بیزانیت: چەند مانگێکە دابەشکردنی ئەم شەش مووچەیە دەستی پێکردووە،  تەنیا لە هەولێر ئەمساڵ 20 ملیار دینار تەرخان کراوە، 20 ملیار دیناریش ماوە، هەر مانگێک بڕی پێنج ملیار دینار لە داهاتی ناوخۆ تەرخان دەکرێت.

لە سلێمانی و دهۆکیش پرۆسەکە بەهەمانشێوەیە، بەڵام ژمارەیەکی کەمتر فەرمانبەرن ماون پارەکەیان بۆ خەرج بکرێت.