بانکی نیشتمان لە کوردستان دەکرێتەوە

ئاڤا نیوز

بانکی نیشتمانی کە سەر بە بانکی ناوەندیی عێراقە، بڕیارە لە سەرەتای ساڵی داهاتووەوە دەست بەکارەکانی بکات لە هەرێمی کوردستان و بە هۆیەوە هاونیشتمانیان لە 19 قەرز و سولفەی جیاواز سوودمەند دەبن.

وێنە گەورەکە: بە هۆی ئەوەی لە هەرێمی کوردستان تاوەکو ئێستا هیچ لقی سەرەکی بانکی ناوەندی عێراق نییە، هاونیشتمانیان نەیانتوانیوە هاوشێوەی هاووڵاتیانی پارێزگاکانی دیکەی عێراق سوودمەندبن لەو قەرزانەی کە ئەوان دەتوانن وەریبگرن.

زانیاریی زیاتر: لقی بانکی نیشتمان لە هەولێری پایتەختی هەرێمی کوردستان دەکرێتەوە، دواتر بڕیارە هەشت لقی دیکەش لە ئیدارە سەربەخۆکان بکاتەوە و بەمەبەستی بەڕێوەبردنیشی ئەنجوومەنێکی 12 کەسی بۆ پێکدەهێنرێت و ئێستا لە قۆناغی وەرگرتنی سیڤی کەسی شیاوە بۆ ئەو پۆستانەی بانکەکە هەیەتی.

لێدوانی فەرمی: جه‌میل ئه‌بوبه‌كر، به‌ڕێوه‌به‌ری گشتیی بانکه‌ پسپۆرییه‌كانی هه‌رێمی كوردستان بە ئاڤای وت: پێش کۆتایی ئەمساڵ دەبێت هەموو ڕێککارەکانی دامەزراندنی بانکەکە تەواو بکرێن، واتا ساڵی داهاتوو دەستبەکار دەبێت.

ئاماژەی بەوەشدا، یەکێک لە ئامانجە سەرەکییەکانی دامەزراندنی بانکی نیشتمان، پێدانی نزیکەی 19 قەرز و سولفە دەبێت بە فەرمانبەران و هاووڵاتیان، وەکو کڕینی خانوو و شووقە، ئۆتۆمبێل، پڕۆژەی کشتوکاڵی، پڕۆژەی پیشەسازی و قەرزی بچووک، بڕ و جۆری قەرزەکانیش بەپێی توانای دارایی بانکەکە دیاری دەکرێن.

ئەمەش بزانە: دوای دامەزراندنی ئەو بانکە، ژمارەی بانکەکانی تر کەم دەکرێنەوە، ئێستا 28 بانکی بازرگانی و کشتوکاڵی و پیشەسازی هەیە، دەکرێنە 8 بانک، هەر پارێزگا و ئیدارەیەکی سەربەخۆ تەنیا یەک بانکی لێ دەبێت.