حکومەتی عێراق: بەرزبوونەوە و دابەزینی بەهای دۆلار بەرامبەر دینار کاتییە

ئاڤا نیوز

ڕاوێژکارێکی باڵای حکومەتی عێراق ڕوونکردنەوە لەسەر هۆکاری بەرزبوونەوە و دابەزینی بەهای دۆلار دەدات و دەڵێت، ئەوەی ڕوودەدات تەنیا دۆخێکی کاتییە و پەیوەندی بە دەنگۆی بازاڕ و قۆناغی گواستنەوەوە هەیە.

چیرۆکی سەرەکی: ماوەیەکە بەهای دۆلاری ئەمریکی لە بازاڕەکانی عێراق و هەرێمی کوردستان ناجێگیرە و  بەهاکەی بەرزبوونەوە و دابەزین دەکات بەرامبەر بە دیناری عێراقی.

لێدوانی فەرمی: مەزهەر محەممەد ساڵح، ڕاوێژکاری دارایی و ئابووریی حکومەتی عێراق ڕایگەیاند: ئەم بەرزبوونەوە و دابەزینانە لە "قۆناغە ئینتیقالییەکاندا" زیاتر دەبن، عێراق ئێستا لەلایەکەوە لە قۆناغی دوای هەڵبژاردنە پەرلەمانییەکەیدایە، لەلایەکی دیکەشەوە لە قۆناغی جێبەجێکردنی حوکمڕانیی گومرگی و ڕێکارە دیجیتاڵییەکانە بەپێی پێوەرە جیهانییەکان (وەک بەدواداچوونی گومرگی)، کە ئامانج لێی دروستکردنی ژینگەیەکی بازرگانی و دارایی شەفافترە.

لەهەمان کاتدا: مەزهەر محەممەد ساڵح جەخت دەکاتەوە کە ئەمە تەنیا "ناجێگیرییەکی سرووشتییە" و کاریگەرییەکی ئەوتۆی لەسەر سەقامگیریی گشتیی نرخەکان دروست نەکردووە، چونکە هێشتا وڵات سەقامگیریی نرخەکانی تێدایە و ناجێگیربوونی نرخی دۆلاریش حاڵەتێکی کتوپڕ و کاتییە و بەردەوام نابێت.