ئەمریکا قەدەغەی گەشتی وڵاتان فراوانتر دەکات

ئاڤا نیوز

دوای ڕاگەیاندنی قەدەغەکردنی گەشتکردن بۆ هاووڵاتیانی 19 وڵات، ئەمریکا ژمارەی ئەم وڵاتانە بۆ 30 وڵات بەرز دەکاتەوە.

ڕاگەیێنراوی فەرمی: کریستی نۆئێم، وەزیری ئاسایشی ناوخۆی ئەمریکا، ڕایگەیاند ئیدارەی ترەمپ ژمارەی ئەو وڵاتانەی کەوتوونەتە ژێر قەدەغەکردنەکەوە بۆ زیاتر لە 30 وڵات بەرز دەکاتەوە.

زانیاریی زیاتر: نۆئێم بە میدیای وڵاتەکەی وتووە، باسی ژمارە ناکەم، بەڵام زیاتر لە 30 وڵات دەبن و سەرۆک هێشتا هەڵسەنگاندن بۆ وڵاتەکان دەکات.

زانیاریی بەدەستهاتوو: ئاژانسی ڕۆیتەرز بە پشتبەستن بە یاداشتێکی ناوخۆیی وەزارەتی دەرەوەی ئەمریکا بڵاویکردووەتەوە، ئیدارەی ترەمپ بیر لە قەدەغەکردنی گەشتی هاووڵاتیانی 36 وڵاتی دیکە بۆ ئەمەریکا دەکاتەوە.

باکگراوند: ترەمپ لە مانگی حوزەیرانی ئەمساڵ فەرمانی جێبەجێکردنی واژۆ کرد کە تێیدا گەشتی هاووڵاتیانی 12 وڵاتی بۆ ئەمریکا قەدەغەکرد و سنووردارکردنیشی بەسەر هاووڵاتیانی حەوت وڵاتی دیکەدا سەپاند. ئەو لەو کاتەدا وتی کە ئەو هەنگاوە بۆ پاراستنی ئەمریکایە لە "تیرۆریستانی بیانی" و هەڕەشە ئەمنییەکانی دیکە.

ئەمەش بزانە: ئەو وڵاتانەی لیستی پێشوو کە داواکارییەکانی کۆچبەرییان لێ ڕاگیراون بریتین لە ئەفغانستان، میانمار، چاد، کۆماری کۆنگۆ، گینیای ئیستیوایی، ئەریتریا، هایتی، ئێران، لیبیا، سۆماڵ، سودان، یەمەن، بوروندی، کوبا، لائۆس، سیرالیۆن، تۆگۆ، تورکمانستان و ڤەنزوێلا.