ئیسرائیل سەدان تیمساح بە بیانووی ڕێگری لە هێرشی تێکدەرانە لەناو دەبات

ئاڤا نیوز

دوای ئەوەی ئیسرائیل، سەدان تیمساح لە کێڵگەی پێتسائێل لە ناوچەی دۆڵی ئوردن (ئەغوار) دەکوژێت و لەناو دەبات، ئیدارەی مەدەنیی و دەسەڵاتی سرووشت و باخچەکانی ئەو وڵاتە دەڵێت، "تەلئەبیب ئەو پرۆسەیەی بۆ ڕێگریکردن لە  هێرشێکی تێکدەرانە ئەنجام داوە"

چیرۆکی سەرەکی: بەپێی میدیاکانی ئوردن، مانگی ئابی ڕابردوودا، ئیسرائیل لە کەناری ڕۆژئاوای دۆڵی ئوردن بەهەزاران تیمساحی کوشتووە و وردەکارییەکەشی بەم دواییانە ئاشکرا بووە.

ڕاگەیێنراوی فەرمی: ئیدارەی مەدەنیی و دەسەڵاتی سرووشت و باخچەکانی ئیسرائیل ڕایانگەیاند: لاوازیی و خراپی شوێنەکە مەترسیی ئەوەی دروست کردووە ئەو تیمساحانە بە ئامانجی ئەنجامدانی هێرش دژی مەدەنییەکان بەرەڵا بکرێن.

زانیاریی زیاتر: ڕاگەیێنراوەکە ئاماژەی بەوەشکردووە، بڕیارەکە بۆ کۆتاییهێنان بووە بە مەینەتیی ئاژەڵەکان کە لە دۆخێکی زۆر خراپ و سەختدا ڕاگیرابوون و خاوەن کێڵگەکە تیمساحە بچووکەکانی وەک خۆراک داوە بە گەورەکان و بۆیە بەپێی پرۆتۆکۆلە نێودەوڵەتییەکان مامەڵەیان کردووە.

لەلایەکی دیکەوە: ئەم بڕیارە ناڕەزایەتی تووندی ڕێکخراوەکانی ژینگە و مافی ئاژەڵانی لێکەوتووەتەوە،  ڕێکخراوەکان ئیدانەی هەنگاوەکەیان کردووە و ڕایانگەیاندووە کە پاساوەکانی ئیسرائیل بێ بنەمان.

بەوتەی ئەوان، زۆرێک لە تیمساحەکان تەندروستییان باش بووە ئەمەش دەریدەخات کوشتنیان لەبەر بەزەیی نەبووە، بەڵکو دەتوانرا بە باشکردنی خۆراک و ئاو دۆخەکەیان چارەسەر بکرێت.