لە پردێ سوپای عێراق ڕێگری لە جووتیارانی کورد دەکات کار لەسەر زەوییەکانیان بکەن

ئاڤا نیوز

لە سنووری پردێ، سوپای عێراق ڕێگری لە جووتیارانی کورد دەکەن، ناهێڵن کێڵان و دروێنە لەسەر زەوییە کشتوکاڵییەکان بکەن، بەبیانووی ئەوەی زەوییەکان هی چەند جووتیارێکی عەرەبن و تەواوی دانیشتووانی گوندەکە هاتنە سەر زەوییەکان بۆ ئەوەی ڕێگەیان پێبدرێت.

چیرۆکی سەرەکی: ئێوارەی ئەمڕۆ شەممە لە سنووری گوندی گورزەیی سنووری شارەدێی پردێ، لەکاتی کێڵان و دروێنەی ژمارەیەک جووتیار لەسەر زەوییە کشتووکاڵییەکانیان،  سوپای عێراق هاتووەتە سەریان و ڕێگریان لێکراوە، بەبیانووی ئەوەی چوار پارچە زەوی کێشەی لەسەرە و تاپۆکانیان بەناوی کەسانی دیکەوە هەیە.

زانیاریی پەیامنێر: دیار محەممەد، پەیامنێری ئاڤا لە کەرکووک گوتی، "سوپای عێراق بە جووتیارانی گوتووە، دوای ئەوەی دروێنەتان لەسەر ئەو پارچە زەوییانە تەواوکرد، دەبێت دەستهەڵگرن و جێی بهێڵن بۆ خاوەنەکانیان."

بەشێکی جووتیارانی ئەو سنوورە بە دیار محەممەد پەیامنێری کەرکووکیان گوت، ئێمە تاپۆی سەردەمی دەوڵەتی عوسمانیمان لایە، بەڵام هاتوون ئەمساڵانە تاپۆیان بۆ عەرەبی هاوردە کردووە و دەیانەوێ موڵکەکانمان داگیر بکەن."

باکگراوند: نیو سەدەیە بەهۆی بڕیارێکی ڕژێمی پێشووی عێراق، کە وەک هەوڵێک بۆ سڕینەوەی کورد و  گۆڕینی دیموگرافیای ناوچە کوردستانییەکان، زەوی جووتیارانی کورد و تورکمانەکان لە کەرکووک و ناوچەکانی دیکە داگیرکراون یان بە بیانووی جیاواز لێیان سەندراوەتەوە، هەشت مانگ بەسەر بڕیاری پەرلەمانی عێراق لەبارەی هەڵوەشاندنەوەی بڕیارەکانی ڕژێمی بەعس و گەڕانەوەی زەوی بۆ خاوەنە ڕەسەنەکانیان، بەڵام تاوەکو ئێستا بەکردەیی جێبەجێ نەکراوە.