بۆ پشووی جەژنی قوربان زیاتر لە 300 هەزار گەشتیار دێنە هەرێمی كوردستان

ئاڤا نیوز

دەستەی گەشتوگوزاری هەرێمی كوردستان لە ئامادەكاریدایە بۆ پێشوازی لە هەزاران گەشتیار كە لە ڕۆژانی پشووی جەژنی قوربان ڕوو لە هەرێمی كوردستان دەكەن، بەپێی پێشبینییەكانی دەستەكە، 300 هەزار گەشتیار لە ناوەڕاست و باشووری عێراقەوە دێنە هەرێمی كوردستان.

وێنە گەورەکە: هەرێمی کوردستان بەو پێیەی سروشتێکی جوان و دڵڕفێنی هەیە، بەتایبەت ناوچە شاخاوییەکان کە بە دەیان هاوینەهەوار و ناوچەی گەشتیاریی هەیە، ساڵانە بەپێی تایبەتمەندیی وەزەکان، بەتایبەت لە جەژنەکاندا بە سەدان هەزار گەشتیار لەناوچەکانی ناوەڕاست و خواروو و بەشیکیش لە دەرەوەی عێراق ڕوو لە هەرێمی کوردستان دەکەن.

لێدوانی فەرمی: ئیبراهیم عەبدولمەجید، گوتەبێژی دەستەی گەشتوگوزاری هەرێمی كوردستان بە ئاڤا میدیای ڕاگەیاند: بە بۆنەی پشووی جەژنی قوربان، هەموو ئامادەكارییەك لەسەر ئاستی حكومی و كەرتی تایبەت كراوە، لە بازگەكان ئاسانكارییەكی زۆر كراوە بۆ هاتنی هەزاران گەشتیار كە زۆرینەیان لە ناوەڕاست و باشووری عێراقن، هەروەها تەواوی بنكە و شوێنە گەشتیارییەكان ڕاسپێردراون كە لە ڕۆژانی جەژن و پشوو كراوە بن بۆ پێشوازی لە گەشتیاران.

- هەرێمی كوردستان بە هەردوو كەرتی حكومی و تایبەتەوە لە ئامادەباشییەكی تەواودایە بۆ پێشوازیكردن لە گەشتیاران.

- پێشبینی دەكەین كە لە ماوەی 10 ڕۆژی پشووی جەژنی قوربان، زیاتر 300 هەزار گەشتیار ڕوو لە شار و شارۆچكەكانی هەرێمی كوردستان بكەن.

- لەگەڵ بەرزبوونەوەی پلەكانی گەرما، ژمارەی گەشتیارانی باشوور و ناوەڕاستی عێراق بۆ هەرێمی كوردستان زیاتر دەبێت، تاوەكو ئێستاش هەرێمی كوردستان بۆ گەشتیارانی عێراق باشترین بژاردەیە.