هۆشیار زێباری: ڕاگرتنی مووچە هەروا بە ئاسانی تێناپەڕێت و بێ دەرئەنجام نابێت

ئاڤا نیوز

ئەندامێکی دەستەی کارگێڕی مەکتەبی سیاسیی پارتی دەڵێت، بڕیاری نەناردنی مووچەی فەرمانبەران سزادانی بە کۆمەڵی خەڵکی کوردستانە، ئەوەش هەروا بە ئاسانی تێناپەڕێت و بێ دەرئەنجام نابێت.

وێنە گەورەکە: چاوەڕێ دەکرا لە کۆبوونەوەی ئەمڕۆی ئەنجوومەنی وەزیرانی عێراقدا، سوودانی بابەتی ناردنی مووچەی مانگی ئایاری فەرمانبەرانی کوردستان بخاتە دەنگدانەوە و بەشێوەی قەرز، مینحە یان سولفە پارەکە بنێردرێت، بەڵام لە کۆبوونەوەکەدا باسی ئەم بابەتە نەکرا، بەمەش گرێی مووچە بە چارەسەرنەکراوی مایەوە و دیار نیە لە دوو ڕۆژی داهاتوودا ڕەوانە دەکرێت یان نا.

لێدوانی فەرمی: هۆشیار زێباری، ئەندامی دەستەی کارگێڕی مەکتەبی سیاسیی پارتی دیموکراتی کوردستان لە تۆڕی کۆمەڵایەتیی ئێکس لەبارەی بڕیاری نەناردنی مووچەی فەرمانبەرانی کوردستان ڕایگەیاند، بڕیاری حکومەتەکەی سوودانی و چوارچێوەی هەمانگی بۆ ڕاگرتنی ناردنی مووچەی فەرمانبەرانی هەرێمی کوردستان لەکاتێکی زۆر خراپ دایە و مەبەست لێی سزادانی بە کۆمەڵ و برسیکردنی هاووڵاتییانی هەرێمی کوردستانە.

ئاماژەی بەوەشکردووە، ئەم بڕیارە هەروەها بە ئاسانی تێناپەڕێت و بێ دەرئەنجامیش نابێت، "مێژووی سیاسی ئێمەش نیشانی دەدات دەستدرێژیکار سزا دەدرێت".

باکگراوند: بەپاساوی ئەوەی هەرێمی کوردستان پشکی لە بودجەدا تەواوبووە و داهاتی ناوخۆشی ڕادەستنەکردووە، ڕۆژی 28ـی ئایار تەیف سامی، وەزیری دارایی عێراق واژۆی لەسەر نووسراوێک کرد و تێیدا ئاماژەی بەوە کردووە، چیتر مووچەی فەرمانبەرانی کوردستان خەرج ناکات.