حکومەتی هەرێمی کوردستان لەبارەی مووچە هەنگاوی نوێ دەگرێتەبەر

ئاڤا نیوز

لە کۆبوونەوەی ئەمڕۆی ئەنجوومەنی وەزیران بڕیاردرا نامەیەکی فەرمی ئاراستەی کۆمەڵگەی نێودەوڵەتیی و نوێنەری وڵاتان بکرێت کە تێیدا لایەنە دەستووریی و یاسایی و داراییەکان ڕوونبکرێتەوە و داوای هاوئاهەنگیی و پشتیوانیی چارەسەرکردنی گرفتی مووچەی هەرێم بکرێت لە چوارچێوەی دەستوور.

چیرۆکی سەرەکی: بەسەرپەرشتی سەرۆکوەزیران مەسرور بارزانی، ئەمڕۆ ئەنجوومەنی وەزیرانی هەرێمی کوردستان کۆبووەوە، تەوەری یەکەمی کۆبوونەوەکە تایبەت بوو بە بەدواداچوون بۆ بابەتی مووچەی فەرمانبەرانی هەرێمی کوردستان.

لێدوانی فەرمی: عەبدوڵڵا حاجی مەحموود، وەزیری کاروباری شەهیدان و ئەنفالکراوان بە ئاڤای گوت:  لە کۆبوونەوەی ئەنجوومەنی وەزیران بڕیاردرا بە دوو ئاراستە کار لەسەر پرسی مووچە بکرێت، یەکەمیان گرتنەبەری ڕێکاری یاسایی و دەستووری، دووەمیان کارکردن بە ڕێگەی دیپلۆماسی لە ناوخۆ و دەرەوە ڕێکار دەگیرێتەبەر بۆ ئەوەی ڕوونکردنەوە بدرێتە بە کۆمەڵگەی نێودەوڵەتیی و پشتگیری بەدەست بهێنرێت.

لەلایەکی دیکەوە: سەرچاوەیەکی بەشدار لە کۆبوونەوەکە بە ئاڤای گوت: لە کۆبوونەوەی ئەمڕۆیدا ، ئەنجوومەنی وەزیران بڕیاریدا، دەربارەی بڕینی مووچە و شایستە داراییەکانی هەرێمی کوردستان، لیژنەیەک پێکبهێنرێت تا سکاڵای هەرێمی کوردستان بگەیەنێتە کۆمەڵگای نێودەوڵەتیی ، بۆ ئەوەی گوشار لە حکومەتی عێراق بکرێت چیتر ستەم لە هەرێمی کوردستان نەکات و مووچە و شایستە داراییەکانی هەرێمی کوردستان وەکو خۆی بنێرێت.