ڕەزامەندی 420 هەزار فۆڕمی پێدانی زەوی لە ئەنجوومەنی وەزیران گەڕاوەتەوە

ئاڤا نیوز

وەزارەتی شارەوانی و گەشتوگوزار ئاشكرای دەكات، تاكو ئێستا ڕەزامەندی 420 هەزار فۆرمی پێدانی زەوی لە ئەنجوومەنی وەزیران گەڕاوەتەوە، داواش لە سەرجەم وەزارەت و دامودەزگاكان دەكات تاكو 20ـی ئەم مانگە، بەڵگەنامە و فۆڕمەكان بهێنن، دوای ئەو وادەیە هیچ فۆڕمێك بۆ پێدانی زەوی وەرناگیرێت.

وێنە گەورەكە: ئەنجوومەنی وەزیرانی هەرێمی كوردستان بە نووسراوی ژمارە 242 لە 27ـی ئاداری 2024، بڕیاریدا بە پێدانی زەوی بە فەرمانبەران و خانەنشینانی هەرێمی كوردستان كە تا ئێستا لە وەرگرتنی زەوی سوودمەند نەبوونە، دوای بڕیارەكەش وەزارەتی شارەوانی و گەشتوگوزار، لیژنەی وردبینی بۆ وەرگرتن و ڕێكخستن و وردبینیكردنی فۆڕمەكان پێكهێنا.

نووسراوی فەرمی: وەزارەتی شارەوانی و گەشتوگوزار نووسراوێكی ئاگاداركردنەوەی ئاڕاستەی سەرجەم وەزارەت و دامودەزگاكانی حكومەت كردووە، تێیدا ئاگاداریان دەكاتەوە كە ڕێككەوتی 20-6-2025، دوا وادەیە بۆ وەرگرتنی فۆڕم و تەواوكردنی كەموكوڕییەكان و هێنانی بەڵگەنامە پێویستەكان بۆ وەزارەتی شارەوانی و گەشتوگوزار، بەپێچەوانەوە دوای ئەو وادەیە، هیچ فۆڕمێكی دیكە وەرناگیرێت.

بابەتە ستراتیژییەكە: وەزارەتی شارەوانی و گەشتوگوزار ئاشكرای دەكات، تاكو ئێستا زیاتر لە 420 هەزار فەرمانبەر و خانەنشین، ناوەكانیان وەردبینیيان بۆ كراوە و ڕەزامەندیی سەرۆكایەتیی ئەنجومەنی وەزیران بۆ تەرخانكردنی زەوی بۆیان، تەواو بووە و ئاڕاستەی شارەوانییە پەیوەندیدارەكان كراون و ئێستاش كارەكانی ليژنەكە لە قۆناغی كۆتاییدایە.